Alingadliwa sengathi yindali kaBlack Friday ifa loshonile
ABANTU abadala njengoVolos bakhonela ukuthi bakhuze uma inqola iphuma esipolini ngoba abantu abancane abakhuzani noma omunye wabo esebonakala ukuthi uyongena ehlathini. Kuyiqiniso elingephikwe yimuntu ukuthi abantu besimanje bangamathatha angakwazi ukwehlukanisa izinto okufanele bazihloniphe nabangafanele bazihloniphe. Kulesi sikhathi esiphila kusona sinenkinga yokuthi abantu abasazihloniphi izimpahla zomuntu oshonile. Thina sikhule sazi ukuthi izimpahla zomuntu oshonile ziyahlonishwa ngoba zithathwa ngokuthi ziyinsila yakhe.
Bakwethu siyavuma ukuthi ifa lomuntu oshonile kufanele lidliwe ngoba usuke engasekho engasophinde avuke kodwa kuwukugagamela okubi ukuthi ifa lomuntu lidliwe liphuthunywe ongathi yindali kaBlack Friday. Siyazi sonke ukuthi isimo sezomnotho asisihle kodwa lokho akusho ukuthi uma kushone umuntu eneselula ene-Airtime sekufanele kusetshenziswe yona kufonelwa abantu. Kuyisimo esingesihle ukuthi umuntu eshonile kodwa ubone inombolo yakhe ibhanyaza ocingweni lwakho ikufonela. Akukuhle kwakhona ukuthi kuthunyelwe u-WhatsApp ngocingo lomuntu ongasekho ngoba kudida abantu bajike bacabange ukuthi akashonile uyaphila.
Ngomunye unyaka ngake ngathuka kabi ngazi ukuthi umuntu ushonile kufanele ngiyomngcwaba kodwa ngabona inombolo yakhe isingifonela. Uma ngemukela ucingo ngavele ngababaza ngibuza ukuthi ubani lona ongishayelayo ngoba usibanibani ongumnikazi wocingo kuthiwa akasekho emhlabeni. Lona ongishayelayo wakhulumela phansi wathi: “Ngiyaxolisa kuyiqiniso ukuthi umnikazi wocingo akasekho emhlabeni kodwa isizathu sokufona kwami wukuthi besifuna ukwazi ukuthi ungakwazi yini ukuzokhulumela abangani bakhe emgcwabeni”. Le ncazelo ngayizwa kodwa ngabanakho ukudinwa nokujabha kokuthi kungani bengishayisa ngovalo ngokuthi bangifonele ngenombolo yomuntu ongasekho.
Ngiyaphinda ngiyasho ngithi abantu banamuhla bayayigila imihlola kusemini ilanga libalele, uthole ukuthi umuntu oshonile ubenemoto okufanele ibekwe isikhashana kusazothiwe kuhlonishwa ukwedlula kwakhe emhlabeni. Kuyisimo esethusayo ukuthi wazi ukuthi umuntu ushonile kodwa uhlangane nemoto yakhe igijima ithwele igilosa. Uma uthi uyabuza ukuthi imoto kasibanibani izula yenzani ngoba ushonile, abaziyo bakuphendule bathi ibhizi ithutha izimpahla zokulungiselela umngcwabo wakhe. Umbuzo uthi bezingasekho yini ezinye izimoto ebezingasetshenziswa kunokuthi kuze kusetshenziswe imoto kamufi? Kwenye indawo ngethuka koma amathe ngibona kuthathwa iveni lomunto oshonile beyomulanda ngalo emakhazeni.
MaSolezwe okaVolos akasho ukuthi uthini kodwa uthi kufanele ihlonishwe imoto yomuntu oshonile ngoba ifana nokuthi iyingubo yakhe yokugqoka. Ungazicabangela ukuthi kuyinto eyethusa kanjani ukuthi umuntu eshonile kodwa ubone ilungu lomndeni wakhe ligqoke ibhantshi lakhe okanye ilokwe abelikhonzile. Ngokomthetho kufanele impahla yomuntu ihlonishwe esagula engakashoni ngoba kuyaye kungabukeki uma ubona abantu begibele imoto yomuntu ogulayo bethi bayombheka esibhedlela.
Kujika kube yinto engachazeki uma sekwenzeka ibhadi lokuthi imoto igingqike ilimaze abantu kanti nomnikazi wayo iyagula ulele esibhedlela. Kuba yinto embi kakhulu uma sekuxoxwa indaba yokuthi imoto yomuntu oshonile yenze isiphihli sengozi. Abantu bajika baphatheke kabi uma kubuzwa ukuthi ibiyaphi imoto yomuntu oshonile njengoba sekuthiwa iphaphalazile yayolimaza ezinye izimoto. Yebo siyavuma ukuthi lempucuzeko eyafika yinhle kodwa akufanele isenze silibale wukuthi kusukela emandulo izinto zomuntu ongasekho zazihlonishwa.