Banethemba lomhlanganiso kaNDZ
I-ANCYL eThekwini inethemba lokuthi uDkt Nkosazana Dlamini Zuma uzowudla umhlanganiso engqungqutheleni ezoba seNasrec eGoli ngelizayo.
Lolu phiko lwentsha kaKhongolose eThekwini luthi yilona olwaqala ukuphakamisa igama likaDlamini Zuma esikhundleni sikamengameli we-ANC njengoba kuyiwa engqungqutheleni.
Okhulumela i-ANCYL eThekwini, uMnuz Thulisa Ndlela uthe noma yikanjani uDkt Dlamini Zuma uzoyibhincisela nxanye imbangi yakhe uMnuz Cyril Ramaphosa oyiphini likamengameli we-ANC.
“Izibalo sesizenzile sabona ukuthi umama (Dkt Dlamini Zuma) uzonqoba,” kusho uNdlela.
Uthe kuyabajabulisa ukuthi yibona abaqala ukukhuluma ngegama likaDkt Dlamini Zuma kwesikamengameli.
“Lesi sinqumo sasithatha engqungqutheleni yethu, saqala salidayisa leli gama nakwezinye izinhlaka zeqembu,” kusho uNdlela. Ungeze ngokuthi baqale ngokukhuluma indaba kaDkt Dlamini Zuma, ingakavulwa ngisho ngokusemthethweni indaba yokuphakanyiswa kwamagama.
Uthe baphinde bavumelana ngokuthi esigungwini esiphezulu sikaDkt Dlamini Zuma kumele kube khona nabantu abasha.
“Siyajabula ukubika ukuthi uNobhala-jikelele we-ANCYL uMnuz Njabulo Nzuza nomengameli we-ANCYL uMnuz Collen Maine amagama abo aphakanyisiwe esigungwini esiphezulu se-ANC esizosebenza noDkt Dlamini Zuma,” kusho uNdlela. Uthe akhona namanye amagama entsha aphikanyisiwe okubalwa uMnuz Kwazi Mshengu, onguSihlalo we-ANCYL KwaZulu-Natal noMnuz Ronald Lamola.
Okwamanje, uRamaphosa usahamba phambili ngamavoti njengoba esathole angu-1860, kwathi uDkt Dlamini Zuma wathola 1330.
Umhlaziyi wezepolitiki KwaZulu-Natal uMnuz Protas Madlala uthe amavoti okwamanje akhombisa ukuthi uRamaphosa usengene ngonyawo olulodwa esikhundleni sobumengameli.
“Uma ungeke ube khona umkhoshosho ngingasho ngithi uRamaphosa usenqobile kodwa kusengenzeka noma yini ngoba uyakhumbula eMelika, uNkk Hillary Clinton ejabula ecabanga ukuthi usenqobile ngokwezibalo kanti kusazophenduka amatafula athathe uMnuz Donald Trump,” kusho uMadlala.
Uthe ngaphandle kokuthatha izinhlangothi, ubona ukuphumelela kukaRamaphosa kungasishintsha isimo seRandi ngoba uthandwa kakhulu abatshalizimali.