Sicela nisibekezelele: Kaunda
UNGQONGQOSHE wezokuThutha nokuPhepha koMphakathi KwaZuluNatal, uMnuz Mxolisi Kaunda, ucele abantu baseMnambithi ukuthi babekezele kwazise isimo asifani njengoba kusebenza amabhasi.
UKaunda ubeseMnambithi izolo eyohlola isimo emuva kokumisa amatekisi kasoseshini iKlipriver neSizwe ngenxa yombango walabo soseshini osuholele ekufeni kwabantu abangu-61.
“Sicela nisixolele ngoba ngeke kufane nokujwayelekile njengoba kusebenza amabhasi. Asilwi nomphakathi, asilwi nabashayeli kodwa siphephisa impilo yabantu. Sifuna kuphele ukubulawa kwabantu embonini yamatekisi,” kusho uKaunda izolo.
IPhini likaSihlalo weSantaco KwaZulu-Natal, uMnuz Sifiso Mthethwa, uthe bayasamukela isinqumo sikaKaunda yize sizoholela ekudliweni kwezimoto ezikhokhelwa nyangazonke.
Uthe bazoqhubeka nokucathulisana namalungu ososeshini abamisiwe ukuze bahlale phansi kutholakale isisombululo amatekisi asebenze.
UMnuz Jabulani Mazibuko weKZN Taxi Alliance uthe bayakhala ngesinqumo sikaKaunda ngoba baningi abantu abazolamba ngokumiswa kwamatekisi.
“Akusibona bonke osomatekisi abalwayo ngakho kufanele kuhlalwe phansi kuxoxwe. Bekuyini ukuthi uKaunda amise osomatekisi abangezi emhlanganweni kunokuthi amise amatekisi awo wonke umuntu. Ukuba bekumiswe laba abangezi emhlanganweni bebezobona ukuthi kufanele bayoxoxisana nabanye ukuze izimoto zabo zingadliwa,” kusho uMazibuko.