Ziwushaye buthule kuDJ phakathi nesonto
WENZE okungajwayelekile uDJ ozinze eThekwini, uChynaman eshadelwa phakathi nesonto yisithandwa sakhe seminyaka. UChynaman, ogama lakhe langempela nguSiyabonga Gumede, ubophe ifindo likasofa silahlane nesinqandamathe sakhe uNomfundo Luthuli. Umshado wabo ubuse-Auberge Hollandaise Guesthouse, eDurban North. Usuku lwabo luqondane nolokuzalwa kukaNomfundo. UChynaman umfake ekhasini lakhe le-Instagram emfisela usuku oluhle lokuzalwa. “Namhlanje kuzalwa inkosazane yakwaLuthuli. Happy Birthday,” kubhala uChynaman.
Ekhuluma naleli phephandaba ukuqinisekisile ukuthi useyindoda eshadelwe. Uthe sebethandane iminyaka engaphezulu kuka-10 nonkosikazi wakhe.
“Sinengane eyodwa futhi njengamanje uzithwele enye. Ngijabule kakhulu ngokwenzeka empilweni yami,” kusho uChynaman yena obegubha usuku lwakhe lokuzalwa izolo.
Emcimbini womshado bekumenywe izihlobo nabangani abasondelene kakhulu noChynaman.
Yize engafunanga ukugxila kakhulu emshadweni kodwa uveze izinhlelo zokukhipha kwakhe i-albhamu entsha ekuqaleni konyaka ozayo.
Usanda kuphumela obala ekhala ngokuthi umculo wakhe awudlalwa emsakazweni.
Kulo nyaka ukhiphe ingoma ethi Solid apike kuyo uZano nethi Chase ayihlanganise noKyle Deutsch.
“Bengiwuhambisa kodwa bengawudlali umculo. Ngokwami umculo, wumculo. Ngeke senze into efanayo sonke ngoba nakhu kudlala igqom’ bese siyayenza. Mina ngikholelwa esitayeleni sami. Nangesikhathi ngikhipha iMillion Times babengayizwa kahle,” kusho uChynaman.
Uthe unazo izingoma eseziphelile azozikhipha kwialbhamu yakhe asebenze kuyo nabadidiyeli bakuleli abadume phesheya ngenxa yokudayisa kwabo umculo ezitolo ze-internet.