Kusinda kwehlela kumqeqeshi wamaBhokobhoko
UKUNQOBA kwamaBhokobhoko ngengcacamezela kwiFrance ngo 18-17 koweCastle Lager Outgoing Series ekuhambeni, kulivalile ihlazo kodwa imibuzo elengayo miningi futhi kusobala ukuthi iminwe ikhomba ngakumqeqeshi waleli qembu u-Allister Coetzee (osesithombeni).
Kucishe konakala lapha uma uzokhumbula ukuthi limi kanjani irekhodi laleli qembu lesizwe kusukela uCoetzee ethathe izintambo kuHeyneke Meyer. Ngeledlule amaBhokobhoko ashaywe yi-Republic of Ireland okushiye abaningi beshaqekile kwazise iqembu likhombisa izimpawu zokuhlehla nyova esikhundleni sokuya phambili.
Ukube iFrance inqobile njengoba kucishe kwenzeka, bekuzoba yihlazo elikhulu lokhu. Bekuzothi akufane nokushaywa yiJapan koweNdebe yoMhlaba ebise-England ngo2015. Lokhu kuphelezelwa ukushaywa yiNew Zealand ngo 57-0 muva nje e-Albany.
Kubanjwe umoya ngaphambi kowe-Italy ngempelasonto kwazise ukaputeni u-Eben Etzebeth noMalcolm Marx balimele kodwa kubukeka kungekubi. Umdlalo ungoMgqibelo eStadio Eugouneo ngo-3 ntambama. Kuliqiniso elingenakuphikiswa ukuthi iFrance iqale umdlalo ikhombisa izimpawu zokuthi ifuna iwini kodwa amaphutha ebiwenza ngebhola ayenzele phansi. Ngenxa yendlela amaBhokobhoko adlale ngayo kufanele ukuba akabuthi quthu ubuthongo uCoetzee. Alidlali neze kahle iqembu lakhe kanti naye akazisizi ngokusishintsha njalo isikimu. Uma ubuka indlela leli qembu lesizwe elinenebulwe ngayo yi-Ireland nesibhaxu seNew Zealand kuyacaca ukuthi mkhulu umsebenzi ohlalele uCoetzee. Ngemuva kokuthola ithuba lokubuyisa amandla nge-Italy ngoMgqibelo, uCoetzee uzophinde athole esinye isivivinyo esinzima kowokuvala uchungechunge lwasemazweni neWales, eCardiff. Umphumela walo mdlalo waseCardiff yiwona ozocacisa okuningi ngekusasa laleli qembu.