Sihalalisela uDkt Shezi oyisibonelo esihle entsheni yakithi
UDOKOTELA Nomusa Shezi uqophe umlando ngokuba udokotela wokuqala wesifazane omnyama oyi-neurosurgeon okunguchwepheshe ohlinza izitho ezibucayi ezihambisana nokusebenza kobuchopho nomgogodla.
UDkt Shezi uneminyaka engu-32 kanti uthe enye yezinto ezimgqugquzele ekufezeni leli phupho kube wukwazi ukuthi ababaningi abantu abawenzayo lo msebenzi ngoba uma sebebonke odokotela abawenzayo ezweni bangaphezudlwana kuka-200.
Okunye wukuthi ukhule ebona futhi ezwa abantu bephelelwa yithemba ngenxa yesifo sengculazi waba nesifiso sokusebenza alethele abantu ithemba.
Siyamhalalisela uDkt Shezi futhi siyaziqhenya ngaye ngoba ukusebenza kwakhe kwandisa odokotela abamnyama abangongoti emikhakheni ebucayi nokuyinto eseyivelakancane. Odokotela abangama-neurosurgeons bakwazi nokusiza abantu abasuke bengasakwazi ukuhamba ngenxa yenkinga yomgogodla bahambe emva kokuhlinzwa.
Okunye okuhle ngokuzuzwe uDkt Shezi wukubona owesifazane omncane enza ezibukwayo emkhakheni osagcwele abesilisa ngoba kusho ukuvuleka kweminyango nakwabanye besifazane. Lokhu kuzogqugquzela nezinye izingane zabamnyama zibone ukuthi noma yini ingafezeka inqobo nje uma umuntu ezimisela futhi ephokophela njengoba eshilo naye uDkt Shezi.
Imqoka nento ayishilo yokuthi ngesikhathi esafunda ubengenasikhathi ngaphandle kwezincwadi zakhe nomsebenzi. Yisifundo esibalulekile lesi entsheni yakithi ngoba kufanele abantu bazi ukuthi ayikho into evele itholakale nje umuntu engazimiselanga futhi engayisebenzelanga.
Kuhle ikhumbule nokuthi ukungazinaki ezinye izinto ezikhonzwe yiningi okwesikhashanyana nje ngesikhathi usasebenzela into oyifunayo akukulimazi ndawo futhi akukubambezeli ngoba kuba yisikhathi esincane bese kuyadlula uphinde uqhubeke nezinto ozithandayo.
Siyafisa-ke ukuthi sande isibalo sabantu abafana noDkt Shezi ezweni lethu ikakhulukazi abendlu emnyama ngoba siyabadinga nathi ochwepheshe abazokwazi ukusisiza beqonda ukuthi ziyini izidingo zethu singabantu abamnyama.
Halala Dkt Shezi, halala.