UNcube nesifiso sokuphumelela
UZITHWESE umthwalo wokulandela ezinyathelweni zezinsephe zabadlali baseZimbabwe abafike kuleli bazakhela igama enkabeni yenkundla umdlali waMaZulu uButholezwe Ncube.
UNcube (25) kubhekwe ukuthi asize Usuthu luqoqe amaphuzu amathathuuma selubhekene neBaroka FC ehlezi esicongweni kwi-Absa Premiership namuhla ngo-7.30 ebusuku. Umdlalo useKing Zwelithini Stadium, eMlazi.
Lo mdlali oyibamba enkabeni yenkundla uveze isifiso sakhe sokulandela ezinyathelweni zabadlali bangakuboabafike bazakhela igama eNingizimu Afrika ngokushaya into ecokeme phakathi nenkundla, izolo emini.
Eminyakeni eyedlule uTinashe Nengomasha uzakhele udumo kwiKaizer Chiefs eyibamba enkabeni yenkundla. Ngo-2003/2004 nango-2004/2005 wasiza iChiefs yadla isicoco sePremiership. Ngo-2004 waqokwa njengomdlali ovelele eNingizimu Afrika.
Ngemuva kwalokho kugqame uWillard Katsande ngo-2016 oqokwe njengomdlali ovelele kwiChiefs. UKatsande ubalwa nabanye babadlali abahlonishwayo njengamanje kwiPremiership. Usanda kushiya eqenjini lesizwe laseZimbabwe abengukaputeni walo.
Omunye umdlali waseZimbabwe oza kabi enkabeni yenkundla nguDanny Phiri ogijima kWILamontville Golden Arrows. Ekuqaleni konyaka ubeseqenjini lesizwe laseZimbabwe elidlale kwi-Africa Cup of Nations (Afcon).
“Ngijabule ngokuthola ijezi. Ngizimisele ngokuqhubeka nokuzinikela ngokusebenza ngokuzikhandla. Umbango wejezi ezinye zezinto ezingiqgugquzelayo. Ngaso sonke isikhathi sihlale sikhuthazana singabadlali. Kuningi engingakufunda kubadlali abafana noKatsande noNengomasha. Umlando wabo ungenza ngikhuthale. Ungenza ngihlale ngilangazelele ukuphumelela ukuze ngizofika ezingeni labo. Bazakhele igama futhi baziwa cishe yonke indawo. Nami ngifuna ukuthi abanye abazolandela emuva kwami bafune ukubukela kimina. Esinye isifiso sami esikhulu wukudlalela iqembu lesizwe. Angikaze ngibizelwe kwelesizwe kodwa angililahlile ithemba,”kusho uNcube.
Usuthu lusazikhotha amanxeba ngemuva kokuqunjwa phansi yiKaizer Chiefs ngo 3-0 emdlalweni weTelkom Knockout Last 16 eMoses Mabhida Stadium. Luzobhekana neBaroka ngaphandle kukaMichael Morton odonsa isigwebo semidlalo emibili, Thapelo Nyongo,Sadat Ouro Okoriko no-Ovidy Karuru bonke abasalimele.
Umqeqeshi weqembu uCavin Johnson uthe ngeke ayithathe kancane iBaroka ngoba ayihlezi esicongweni ngephutha.
“Abadlali bawulungele umdlalo. IBaroka elinye iqembu, uma ulihlasela nalo liyakuhlasela. Uma uhlala emuva nalo lizohlala emuva. Uma ulibhamuza phezulu nabo benze njalo. Yiqembu elidlala ngezindlela ezahlukene, abahlezi esicongweni ngephutha. Amaqhinga abawasebenzisayo yiwona abatholela imiphumela,” kusho uJohnson.