Elinye ithuba kubasiki bengqephu abasafufusa
SELIPHINDE lavuleka ithuba kubasiki bengqephu abasafufusa abafuna ukuqeqeshwa ngaphansi kweDurban Fashion Fair (DFF) ehlelwa uMasipala weTheku. Kumenywa bonke abafuna ukuba yingxenye yalolu hlelo ukuba bafike emcimbini wokuzethula ngoLwesine ngoNovemba 9 eBotanic Gardens, eThekwini.
Uhlelo lokuqeqesha abasiki bengqephu luyizinyanga ezingu-10 kanti okwesihlanu lukhona nonyaka. Umasipala usebenzisana nabasiki bengqephu asebephumelele ukucija abasafufusa, ababuye bathole nethuba lokuya kweminye imibukiso yemfashini phesheya. Asebeqeqeshiwe bangenela nomncintiswano obizwa ngeDFF Rising Stars lapho kuncintisana abasuke beqeqeshwa. Inhloso yalolu hlelo wukuthi abasiki bangene ebhizinisini lemfashini bangagcini ngokulandela lo mkhakha ngenxa yothando. Abebeyingxenye yohlelo ngokwedlule ngu-Athenkosi Mfungula waseLamontville, Claudia Novuka waseGlenwood noLeona Pillay. Yibona abagcine ukuwina kwiDFF Rising Stars.
Bonke bathe bangena kulolu hlelo befuna ukuthola ulwazi olunzulu ngezemfashini ukuze bafinyelele kwelinye izinga.
UNksz Sindi Shangase, oyimenenja yohlelo ophikweni lwezamabhizinisi, ezokuvakasha nokudayiswa kwempahla kumasipala, uthe imboni yemfashini iyingxenye enkulu yokuthuthukisa umnotho.
“Le mboni isishintshe kakhulu futhi ikhula ngokushesha emhlabeni jikelele. Uhlelo lokucija abasiki bengqephu luzobanika amathuba okungena emabhizinisini,” kusho uNksz Shangase.