Liya lenyuka izinga lemicimbi ezikoleni
BANGENA bathi shi ezindlekweni abazali uma izingane zenzelwa imicimbi yokuvaleliswa ezikoleni, eliya ngokwenyuka izinga layo. Yize bekujwayeleke ukuthi abazali bangene ezindlekweni uma ingane yenzelwa iMatric Dance, iyanda eminye imicimbi yokuvalelisa abafundi. Kulezi zinsuku uma unengane efundayo kumele ulungiselele imicimbi emithathu yokuvalelisa abafundi esikoleni ngokwezigaba zabo. Umcimbi wokuqala kuba owokuvalelisa kaGrade R, kulandele okaGrade 7 kungcine iMatric Dance kaGrade 12.
UNkk Buyi Ncanana ungomunye wabazali abasanda kungena ezindlekweni ngomcimbi weFarewell yakwaGrade 7. Wenze isiqiniseko sokuthi uyayijabulisa indodakazi yakhe uSinengcebo (12) ofunda eDurban Christian School. Bekuwumcimbi wesibili endodakazini yakhe athe yenzelwa owokugqoka ijazi esikoleni sakwaGrade R.
“Besivele sazi kuqala unyaka ukuthi kuzoba nalo mcimbi esikoleni. Besimkhuthaza ngawo ukuze aphase, simthembisa ukuthi siyomenzela konke akufunayo uma ephase kahle. Bengingeke ngingamvumeli aye kulo mcimbi ngoba ngiyazi usebenze kanzima kanjani esikoleni,” kuchaza uNkk Ncanana.
Uthe akuthanda ngendodakazi yakhe ukuthi yize izithanda izinto ezinhle kodwa ayibacindezeli abazali. Yilokhu okwenze ukuthi bavume ukwenza noma yini eyicelile ngalo mcimbi.
“Wacela ukuthi ufuna ukubukeka njengoCinderella, ngamthengela konke akudingayo ukuze afane naye. Ngimthengele ingubo, izicathulo walungisa nezinwele ngendlela ayifunayo. Ngenxa yokuthi isikole sabo ngesamakholwa, bebengavumelekile ukuthi babe nophathina babafana, okuyinto engiyijabulele,” kusho yena.
UNkk Ncanana uthe umcimbi ubusemini kuhlangene izingane nothisha kuphela. Yize ethi umcimbi ube ngamahora ambalwa, amalungiselelo awo abedinga isikhathi nemali.
“Lo mcimbi asiwubukanga njengozoqeda imali kodwa ubalulekile enganeni. Ngiyazi abanye abazali babheka kakhulu iMatric Dance kanti nalona ubalulekile ngoba ingane isuke iyoqala isikole samabanga aphezulu. Ngibone kumele ngiyanelise ingane ngoba kukhona ezinye ezifisayo kodwa abazali bangabi nawo amandla. Izingane azikasiboni kangako isidingo sokufunda, imicimbi enjengalena yiyona ezikhuthazayo ukudlulela kwamanye amabanga.”
UNkk Ncanana, onendodana uCebolenkosi ofunda uGrade 5, uthe naye bazomenzela okufanayo. Sebeqalile ukumkhuthaza ngokuthi aphase kahle ukuze naye abe yingxenye yomcimbi ofana nokadadewabo.
Kwezinye izikole ngisho umcimbi kaGrade R ufana ncamashi neMatric Dance. UNksz Khethiwe Gumede, ingane yakhe efunde uGrade R ePhoenix Heights Primary, uthe abenzelwanga umcimbi wokugqoka amajazi kodwa kwenziwa iDebs Ball.
“Saqala ukukhokha phakathi nonyaka, ingane ithenge amathikithi. Ngisho abazali bebenikwa amathikithi okumele bawadayisele izihlobo ukuze kuqoqwe imali. Ngosuku lomcimbi ingane bekudingeka ibe nophathina wakhona esikoleni, batshelwe nokuthi bagqokeni. Ngangena ezindlekweni ngoba bekumele ngimthengele izimpahla ezimhlophe, enze nekhanda,” kusho uNksz Gumede.
Uthe lo mcimbi ubusebusuku, abazali bamenywa njengoba bekunikezwa nemiklomelo ezinganeni ezenze kahle. Uthe akayikhaleli imali ngoba lo mcimbi uyohlala uyisikhumbuzo enganeni.