Iminyaka engu-20 kumdlwenguli
UGWETSHWE iminyaka engu-20 owesilisa (64) waseShowe obethathwa njengomfundisi endaweni olahlwe yicala lokudlwengula intombazane eneminyaka engu-10.
ULindinkosi Malomeni Nxumalo, okuthiwa ubaziwa njengendoda ehloniphekile nebibuye yenze imisebenzi yabefundisi endaweni ebihlala kuyona, ugwetshwe ngoMsombuluko yinkantolo yesiFunda, eShowe ngecala lokudlwengula elenziwa ngonyaka odlule.
Nyakenye Isolezwe labika ngokuboshwa kukaNxumalo ngesikhathi esolwa ngokudlwengula ingane ena-10 eyafika esitolo sakhe izothenga uswidi. Ingane kuthiwa yayilibangise esikoleni efunda kuso esiseduze kwesitolo abelala kuso uNxumalo.
Kuthiwa uNxumalo wathi awukho uswidi ebiwufuna wayitshela ukuthi ayingene ngaphakathi esitolo ibheke okunye engakuthanda. Kuthiwa wayitshela ukuthi ayidanse yathi ayikwazi ukudansa wase eyifukula eyiyisa lapho ayelala khona wayidlwengula wase eyinika ama-chips.
Ingane yaqhubeka yaya esikoleni nokuyilapho yafike yabika ngokudlwengulwa kwayo.
Ekhuluma naleli phephandaba umkhulu wengane, ogama lakhe ligodliwe, uthe namanje akukakholakali kubona ukuthi uNxumalo wenza into efana nalena.
“Ubengumuntu olungile obewusizo emphakathini. Ubengeyena umfundisi kodwa abantu bebemthatha njengomfundisi. Bekuthi uma kunezinto okufanele zenziwe ngabefundisi kucelwe yena ukuthi azenze uma umfundisi engatholakali. Ubengumuntu ebesisondelene naye ebesingamcabangeli ukuthi angenza into efana nale,” kusho umkhulu wengane.
Noma ethe into eyenziwa nguNxumalo yimbi kodwa uveze ukuthi ubengafuni ukuthi agwetshwe udilikajele.
“Miningi yona iminyaka engu-20 kodwa ingconywana kunodilikajele. Besingafisi ukuthi agwetshwe udilikajele. Yinto ongeke uyifisele muntu leyo. Nangesikhathi egwetshwa besinako ukuphatheka kabi kodwa ke ayikho into engenziwa uma umthetho umlahla ngecala. Isenzo sakhe saba sibi kakhulu ngoba ingane lena ngumzukulu wami, yingane yendodakazi yami,” kusho umkhulu wengane.
Uthe ingane ayikaze ibe sesimeni esihle ngokomqondo kusukela kwenzeka lesi sigameko.
Uthe ayisaqhubi kahle esikoleni ngoba ayikaze iphase kusukela kuqale unyaka kanti sebecabanga nokuyishintsha indawo ehlala kuyona ishintshe nesikole. Uqhube wathi ingane seyiphathwa nayisifo sohlangothi nabakholwa wukuthi isigameko sokudlwengulwa kwayo saba nomthelela kulokhu ngoba beyingakaze ibe nenkinga enje phambilini.
UKhomishana wamaphoyisa obambile KwaZulu-Natal, uMajor General Bheki Langa, usamukele isigwebo wathi sizoba yisexwayiso kwabanye abacuthela izingane nabesifazane babagile umkhuba.
Uncome umgilwa owaba nesibindi wabika ngokuhlukunyezwa kwakhe emaphoyiseni.