Uchitha eyokuhlangana kwezinto
UMQEQESHI wePlatinum Stars, uRoger De Sa, uchitha eyokuhlangana kwezinto eqenjini eliwine umdlalo wokuqala wesizini ka-2017/2018 likhipha iMaritzburg United kwiTelkom Knockout sekushaywa amaphenathi eHarry Gwala Stadium ngoLwesihlanu ebusuku.
IDikwena iwine ngo 3-1 kumaphenathi emuva kokuthi umdlalo uphele zibambene ngo 0-0. Emidlalweni ye-Absa Premiership, ayikaze iwine nowokubika. Idlale ngokulingana kwemine, yahlulwa kweyisihlanu.
“Akukhona ukushintsha kwezinto lokhu, omunye nje umdlalo. Angikwazi ukusho lokho. Ngicabanga ukuthi kade sidlala kanjena emdlalweni emine edlule. Sidlale ngokulingana nePirates, neFree State Stars, sahlulwa ngephenathi ngomzuzu wokugcina sibhekene ne-Arrows, saphinda sadlala ngokulingana naMaZulu sadala nephenathi,” kusho uDe Sa.
“Ngicabanga ukuthi kusukela emdlalweni wokuqala sihlulwa yiSuperSport ubuvele umncane umehluko. Lona nje bekuwumdlalo lapho ungcede ethuke ezishaya endukwini. Sibe nenhlanhla nje namuhla. Ngokwesimo esikuso bekuzoba ngcono ukuba bekuwumdlalo weligi. Kodwa ngiyethemba ukuthi lokhu kuzoba yisiqalo sezinto ezinhle nomuzwa omuhle eqenjini. Okubi obekungenzeka wukuthi singawini emuva kwemizuzu ewu-120.”
IDikwena izokwamukela i-Ajax Cape Town emdlalweni wePremiership ngoLwesithathu eRoyal Bafokeng Stadium ngo7.30 ebusuku.
“Sidinga ukuthola amaphuzu awu-30. Kufanele sifike lapho, yilokho esizibekele khona. Umdlalo ne-Ajax mkhulu kithina. Sesidlale imidlalo emithathu singahlulwa. Kusuka ekutholeni isibhaxu masonto wonke, manje asisayazi induku kwemithathu. Kuwukucathula kodwa ngiyethemba sizolunga,” kusho uDe Sa.
Umqeqeshi uFadlu Davids uthe amaqembu aseyibambile indlela abadlala ngayo. ITeam of Choice izovakashela iBlomfontein Celtic emdlalweni wePremiership eDr Molemela Stadium, eFree State, kusasa ngo7.30 ebusuku.
“Ukuqala kahle isizini kwenza amaqembu ayibamba indlela esidlala ngayo nokubhekana nayo. Kodwa ngeke sikhale ngalokho, kufanele thina njengabaqeqeshi siqhamuke neqhinga lokubhekana nalokhu,” kusho uDavids.
“Emidlalweni emibili esizoyidlala kufanele sithole amaphuzu ayisithupha. Yomibili isekuhambeni neCeltic nePolokwane City. Kubalulekile ukusebenzisa imidlalo emibili esisele ngayo. Kufanele siyishintshe siyenze amaphuzu.”