UThongathi luphuthwe yithuba leTop 8
BADEDELE ithuba lokungena kwiTop 8 omakoti beNational First Division (NFD), uThongathi, bebanjwa yiTshakhuma Tsha Madzivhandila ePrincess Magogo Stadium, KwaMashu izolo ntambama
UThongathi, olunyukele kwiNFD ekupheleni kwesizini edlule, belunethuba lokubalwa namaqembu ayisishiyagalombili kwi-log. Beluzodeda kwamanye amaqembu aKwaZulu-Natal amathathu okuqale imidlalo yangempelasonto engaphandle kwe-Top 8 okuyiRoyal Eagles, Real Kings neRichards Bay. Ukudonsa kanzima kwamaqembu akulesi sifundazwe kufaka ingebhe yezembe ekupheleni kwesizini ka-2017/2018.
Emdlalweni wayizolo, uThongathi luqale ngegiya eliphezulu, luvunwa wumoya kodwa luhluleka ukusebenzisa amathuba. Bekubhoke kakhulu uSiyabonga Thwala noSiyabonga Vilane ababengabagadli baMaZulu kwi-Absa Premiership.
Nokho iTshakhuma ibikhombisa ukuba yingozi uma ilibeka phansi kwazise ibiyithola kalula intuba odongeni lwasemuva loThongathi. Iminyakazo ibiphelela ezandleni zikanozinti uBongani Manavhela. Ngomzuzu ka-22 uVilane uhluleke ukujezisa iTshakhuma ngemuva kokuthi unozinti wayo uMartin Mthimkhulu emuphe ibhola esebhokisini ezama ukulinika uzakwabo. UMthimkhulu ulichithele ngaphandle kwaba yikhona.
Esiwombeni sesibili, iTshakhuma iphaphamile abadlali bayo sebezama ukukhahlela bekude kodwa izinto zingahlangani. Sekusele imizuzu embalwa umdlalo uphele abadlali boThongathi bacishe baqeda umsizi kanondweba ekhomba ekhoneni ibhola abebethi yigoli.