Bayamkhathaza ‘oqhwasha’ bamagoli
UMQEQESHI we-Orlando Pirates uMilutin “Micho” Sredojevic uphumele obala ngokukhathazeka ngesifo esibhekene neqembu ngokuwina “ngoqhwasha” kule sizini ka-2017/18.
Ngempelasonto iPirates izibekisele indawo kumaquarterfinal eTelkom Knockout ngemuva kokuqumba phansi iLamontville Golden Arrows ngo 1-0 wegoli likaThabo Qalinge emdlalweni obusePrincess Magogo Stadium, KwaMashu.
Kusenzeke kanye kuphela kule sizini ukuthi iPirates ishaye amagoli amabili emdlalweni owodwa. Yonke eminye imidlalo yayo iphela ngo 1-0.
USredojevic othathe izintambo zokulolonga iPirates ekuqaleni kwesizini ukusho kwagcwala umlomo ukuthi iyamhlupha indaba yokuhluleka kwezakhe wukushaya amagoli.
“Yebo sinqobile kodwa ngeke ngikubalekele ukuthi iyangihlupha indaba yokuhluleka wukushaya amagoli amaningi. Ngiyayemukela inkinga esibhekene nayo. Sibhekana nenkinga efanayo njalo yokuthi ngemuva kokushaya igoli lokuqala sibe sesiyahlukeka wukuthola elesibili. Sisuke sizitshela ukuthi sizoshaya imbudlu yamagoli kodwa ngebhadi sihluleke. Inkinga okumele sisebenze kanzima ukuyilungisa,” kusho uSredojevic.
IPirates isashaye amagoli ayisikhombisa emidlalweni eyisishiyagalolunye kule sizini. Emdlalweni wokuqala weligi iPirates ishaye iChippa United ngo 1-0, kowesibili yabambana neBaroka FC ngo 1-1, kowesithathu yaqumba phansi i-Ajax Cape Town ngo 1-0 , kowesine yadlala ngokulingana ngo 0-0, kowesihlanu yathela othulini iCape Town City. Kowesithupha yashaywa yiBidvest Wits ngo 1-0, kowesikhombisa yadlala ngokulingana ngo 2-2 nePolokwane City kwathi kowesishiyagalombili yabambana nePlatinum Stars ngo 1-1 njengoba kowabakhaya idlale ngokulingana ngo 0-0.
NgoLwesithathu ngo-7.30 ebusuku iPirates izodudulana neMamelodi Sundowns e-Orlando Stadium, eSoweto, eGoli, emdlalweni we-Absa Premiership.
“UWayne Sandilands uyabuya emdlalweni weSundowns. Besimphumuzile, isizini isayinde yingakho sinike uJackson Mabokgwane ijezi. Akumele abantu bagxile kakhulu kuRhulani Mokwena neSundowns ngoba kudlala iPirates neSundowns hhayi yena neSundowns. Uzoqhamuka nemibono namaqhinga akhe njengenjwayelo. ISundowns ngiyayihlonipha kakhulu nomqeqeshi wayo uPitso Mosimane ongumfowethu. Ifomu ngeke isebenze uma sesibhekene neSundowns. Ukuthi abenzi kahle futhi sesidlale imidlalo emine singawini kwiligi ngeke kwenze mehluko,” kusho uSredojevic.