Abalaleli mabayeke ubuxoki nokuqhathanisa abasakazi
MHLELI: Ngingumlaleli wemisakazo futhi ngiyazifela ngawo uma ngiphumulile noma ngimatasa. Into engiyaye ngiyibuke kithina njengabalaleli wukuthi asifuni ukunikeza onikwe ithuba lokusakaza okunguye umsakazi futhi sinenkinga yokuthanda isiqu somsakazi kunokuthanda umsakazo nezinhlelo zawo.
Ngike ngazinika ithuba ngilalele le nsizwa enguNkosinathi Mshengu (osesithombeni) ohlelweni iSigiya Ngengoma, yize ngiyaye ngimuzwe kwezinye inhlelo zakhe. Engingakubalula wukuthi abaphathi boKhozi FM bawenzile umsebenzi wabo ekumfakeni noBK MCHUNU. Sekukuye ukuthi ulibamba ngazo zombili noma ngesisodwa ithuba.
Yize iningi limgxeka kodwa limgxekela ukuthi akawubambi umshini kubalaleli abanhlanhlathayo futhi ufuna into eqondile kubona. Abamgxekayo yilaba abamlalelayo kwezinye inhlelo zakhe lapho evutha khona engabaselwe, akazwani nabalalaleli abangalaleli abavele bafone baphume esihlokweni. Kulabo balaleli uyabakhuza abayale bese eyabathethisa uma beqhubeka.
Kukhona omunye owake wangena emoyeni wakhonza ekubeni kwakukhulunywa ngesihloko esithile, omunye wafona ekubeni uMshengu wayethe akufone izalukazi namakhehla kulolo hlelo lwakhe oluthi Lusothandweni.
Wabakhuza laba balaleli wabona nje ukuthi akwehli kahle kubo ngoba wabona sebebhala kwezokuxhumana izinkundla bemgxeka ngesenzo sakhe. Kuyiqiniso elingeke liphikwe ukuthi thina balaleli sigxeka ngoba sigaqele ukuba kuleyo ndawo ekubeni asibazi ubunzima bayo futhi sicabanga ukuthi ukusakaza kuyinto elula nje.
Ngiyafisa ukuba sazi ukuthi ukusakaza noma ukuba semoyeni kusuke kusetshenziwe emuva kwawo umbhobho futhi kudinga isibindi. Ngike ngizibuze ukuthi kungani sibe ngabalaleli abaqhathanisayo lapho sithi ubani ubengcono kunobani. Lokho kwakha ukuthi ungabe usawubona umsoco ofika naloyo onikwe ithuba.
Mina ngimbona uMshengu eze nomkhulu umehluko futhi uzokwenza uhlelo luhlabahlose njengoba umuzwa uBK ukuthi uphezulu, kumele asebenzisane naye abephansi ukuze ongamuzwa uBK kodwa amuzwe uMshengu . Thina balaleli asiyekeni ubuxoki bese sinika abasakazi abanikwe umsebenzi ukuba bawenze futhi bazowenzisisa. Khabzela Mzimela EZWELIBOMVU