Amalungu e-ANC asekhombana ngezibhamu
USUTHATHE elinye igxathu umbango wokuvala isikhundla sikaMengameli Jacob Zuma njengoba amanye amalungu e-ANC KwaZulu-Natal esesabisana aze akhombane ngezibhamu.
UNobhala waku-ward 5 eTugela Ferry, uMnuz Simphiwe Mbhele, ngoLwesihlanu ubhalele uNobhala weqembu esifundazweni, uMnuz Super Zuma, noNobhala-jikelele, uMnuz Gwede Mantashe, ekhala ngokuziphatha kukaSihlalo wabo, uMnuz Ntokozo Ndlovu.
Ubudlelwano bukaMbhele noNdlovu abubuhle njengoba bengaboni ngaso linye mayelana nokuthi ngubani okumele abe ngumholi we-ANC ngemuva kwengqungquthela kaDisemba.
UMbhele usola uNdlovu ngokuphula imigomo yomhlangano wamagatsha ukwenza isiqiniseko sokuthi i-ward yabo ikhetha uDkt Nkosazana Dlamini Zuma.
UNdlovu akatholakalanga izolo ukuthi aphawule. Ucingo lwakhe belukhala lungabanjwa.
UMbhele uthe kunamalungu asesimeni esikahle abe nomhlangano wegatsha awu 28.
Isikhalo sikaMbhele ngesinye seziningi ezidluliselwe kwi-ANC esifundazweni kusukela kuqale uhlelo lokuhlala kwemihlangano yamagatsha emasontweni ambalwa edlule.
Encwadini yakhe uMbhele uthe umqulu wamagama asetshenzisiwe emhlanganweni wabo akuwona lona awusayina ngemuva kokucwaningwa.
Uthe kukhona ilungu okuthiwa livuselele ubulungu balo ngoMashi nonyaka libe lashona ngo-2015.
“Amalungu ubulungu bawo bebungacwaningwa, kungakhishwa mazisi. Okuthusayo wukuthi nami nginguNobhala nginqatsheliwe ukuthi ngibhalise,” kusho uMbhele.
UZuma uphikile ukuthi uyasazi isimangalo saseTugela Ferry, wathi yena uthole isimangalo esivela esifundeni iMoses Mabhida, esesilungisiwe wubuholi besifunda.
“Indaba yaseMoses Mabhida ilungisiwe azikho ezinye izimangalo ezikhona,” kusho uZuma.
Khonamanjalo, uNobhala wenyunyana yokusansimbi KwaZulu-Natal, i-Liberated Metalworkers Union of South Africa (LIMUSA), uMnuz Gcina Dlamini, uthe abalandeli bePhini likaMengameli, uMnuz Cyril Ramaphosa, izolo baphazamise umhlangano waku-ward 29, okwakumenyezelwe ukuthi uzohlala ngoNovemba 4.
“Sizwe ngezimpukane eziluhlaza ukuthi umhlangano wegatsha uzohlala, sathi uma siya kobheka safica amalungu e-ANC engena ehholo kugcwele amaphoyisa, silwile waze wahoxa umhlangano,” kusho uDlamini.