Kwandisa umkhokha ukuthi umuntu ozibulele ushonile
SISESOLIMINI. Isizwe siyisizwe ngolimi lwaso. Yilona oluhlanganisa abantu. Abantu abakhuluma ulimi olulodwa bayaxhumana bazwane. Kuyenzeka nokho abanikazi bolimi baluthathe kalula kanti sebeyalubulala. Ngenxa yokulujwayela abaqikeleli. Ukwazi ulimi akukona ukwazi amagama nje kuphela kepha nokuwaqonda. Ulimi ngelinye lamagugu esizwe. Kumele luphathiswe okwezikhali zamaNtungwa. Ubugugu abusho lutho uma bungadluliselwa esizukulwaneni esilandelayo. Kodwa lokho akuluvimbi ulimi ukuba lungaguquki.
Kunabaculi abaziwayo abaneculo elithi: Masimbonge ongaphezulu. Baqonde ukuthi Asimbonge Ophezulu. Lokhu abakushoyo kuzisholo okunye nje. Sivamile ukuphambanisa udumo nedumela. Udumo lusho ukwaziwa kakhulu komuntu ngokuhle akwenzile. Idumela ukuthandwa kwento isigubhukane. Udumo oluza mawala. Kunomehluko omkhulu phakathi kwamagama “angizange” nelithi “angikaze”. Elokuqala lisenkathini esanda kudlula. Uma umuntu ethi angizange ngimbone uqonde ukuthi angimbonanga. Uma ethi angikaze ngimbone uchaza ukuthi selokhu kwathi nhlo akakaze ambone. Akamazi.
Amagama mbibi negama bhibi ahlukene. Elokuqala livamise ukusebenza njengesisho; angizange ngikuthi mbibi ukudla. Angikuzwanga. Akuwuthintanga umlomo wami. Angizange ngiwuthintise ngako umlomo wami. Igama bhibi lihambisana nokushaya ngenhlanekela; ngizokuthi bhibi ngempama. Igama ubuyaphi? Livamise ukusetshenziswa eGauteng. Basuke beqonde imvelaphi yakho. Basuke lokhu bekuphambanisa nokuthi uqhamukaphi noma uvelaphi? Ukubuya kusho ukuphinda emumva. Ubuya uma sewuke waya phambili. Umabuyemendweni nje owesifazane oke waya emendweni.
Kunomehluko omkhulu ophakathi kwamagama ukufa nokuphangalala nokushona. Ukufa kusho ukuphuma komphefumulo. Noma yimuphi umuntu noma isilwane esiphume umphefumulo sifile. Kunezindlela ezahlukene zokufa. Umuntu ofe esemdala kakhulu kuthiwa ugodukile. Kusuke kuhlonishwa indlela afe ngayo. Ukufa komuntu omdala kuyahlonishwa. Lokho akusho ukuthi akafanga kepha kuhlonishwa ibanga lakhe lobudala. Akugoduki noma ubani. Ngeke nje kufe umthakathi kuthiwe ugodukile, ngisho angaba mdala kanjani. Umthakathi uyafa. Enye indlela yokuhlonipha ukufa komuntu omdala ukuthi uphangalele. Leli gama livamise ukusetshenziswa uma umuntu efe ngokugula. Kuyenzeka futhi kuthiwe ushonile.
Ukushona ukufa okulindelekile. Ukufa kozumo kubizwa ngokufa. Umuntu ozibulele ufile akashonanga. Kungaba iphutha ukulubiza kahle lolu hlobo lokufa. Kwandisa umkhokha ukuthi umuntu ozibulele ushonile. Kuyefana lokhu nomuntu ofe ngesibhamu, ngengozi. Ofe ngokudutshulwa yena asilokothi sithi ushonile. Uma sithi ushonile kusho ukuthi besikulindele ukufa kwakhe. Sesihlonipha isibhamu esimbulele. Ngamanye amazwi siyakukhuthaza ukudutshulwa kwabantu uma sizokuthi bashonile. Abanye bacabanga ukuthi kuwukubahlonipha abafelwe uma betusa umsebenzi wesibhamu bethi obulewe ushonile. Umuntu owemuke nomfula uminzile noma uye kosika ilala. Nakhona akushiwo ukuthi ushonile ngoba ufe ngokuzuma wafa ngengozi.
Kunomehluko phakathi kwamagama buka nelithi bona. Ukubuka ukuvula amehlo ugqolozele into. Ukubona ukuba nesithombe esigcwele salokhu okubukayo. Ngisho ungakwazi okubukayo kepha uma ubona ubungako, umbala nokuma kwalokhu okubukayo, uyakubona. Into ebonakalayo yileyo ebonwa ihlo. Kuyenzeka nokho ukubona kube sezingeni elithe thuthu; njengokubona kwesangoma nokubona kokuyiqonda into. Uma umuntu ethi “o hho, sengiyabona” usho ukuthi useyambuleleka.
Amagama gugula nelithi khukhula acishe afane. Ukukhukhula ukumukisa yonke into. Ezibongweni zeSilo sakwaNodwengu kunemigqa ethi “Isikhukhulane sikaNdaba esikhukhule omame sabetshatha.” Sasihamba nabo bonke, kanye kanye. Ukugugula ukususa yonke into nezingxabo zayo. Ukususa ngobuningi ukuphale kungasali lutho. Isiga okuvelile endaweni okusamshophi. Kuyinto esamuga evele kungalindelwe bese iba indaba egudwini. Isaga isiqubulo. Inkulumo buciko eyakhelwe phezu kweqiniso lokwenzeka kwento iphindelela. Igama umyalezo livamise ukuphambaniswa negama elithi umlayezo. Umyalezo usuka egameni “yala”. Ukuyala ukudlulisa inkulumo eyiseluleko. Nalapho sewuyiphathisa omunye inkulumo wedlulisa umyalezo. Likhona igama elithi “laya” kepha umlayezo awusuki kulo. Indlela adlala ngayo hhayi ngakhona. Ikheli lasemoyeni makhobak@unizulu.ac.za