Sekusele ababili abazodlana imilala
SEKUSELE abashayeli ababili emncintiswaneni wokubheka umshayeli omusha iVolkswagen Driver Search yanonyaka eZwartkops Raceway, ePitoli.
Kuqale kungabashayeli abangu-14 bahlolwa ngezinto ezifana nokuhlolwa imizimba yabo e-University of Pretoria High Performance Sports Centre nokushayela eZwartkops. Uhlelo luhlanganise nokufundiswa ngabezindaba, abaxhasi nokufundiswa ngokushayela.
Abashayeli asebesele nguTalha Moosajee noRaais Asmal.
“Sijabule ngendlela umcimbi ka-2017 ohambe ngayo kuze kube yimanje,” kusho iNhloko yeVolkswagen Motorsport, uMnuz Mike Rowe.
“IVolkswagen izimisele ngokutshala ezweni lethu nokuthuthukisa into ebalulekile, okungabantu balo kodwa futhi siyazifela ngomdlalo wezimoto. Ngohlelo lweDriver Search siyakwazi ukuhlanganisa lezi zinjongo zethu futhi sifeze izinhloso zethu,” kusho uRowe.
Umncintiswano ubushubile eZwartkops Raceway ngesikhathi sekusele abane behamba ngamaVolkswagen Polo. Ekugcineni kosuku kugcine kusala uMoosajee no-Asmal abaphume phambili.
UMoosajee unolwazi ngokushayela izimoto zomjaho obhuqwini kanti u-Asmal yena uke washayela ama-kart lokhu okwenze kwaba yigxathu elikhulu kubo bobabili ukungena kwiPolo bayishayele enkundleni yezimoto zomjaho.
U-Asmal uthe: “Angazi ukuthi ngithini. Awekho amazwi angachaza indlela engizizwa ngayo manje.”
UMoosajee uthe usehlalelwe wumsebenzi omkhulu njengoba kumele azilungiselele umjaho wamahora amathathu.
Laba bashayeli bobabili bazoshayela imoto nomshayeli owanqoba umncintiswano wangonyaka odlule u-Jonathan Mogotsi emjahweni wamahora amathathu ePort Elizabeth ngoNovemba 18. Onqobile uzomenyezelwa ngemuva kwesonto eZwartkops emjahweni wokugcina wonyaka.
“Sibafisela inhlanhla bobabili. Bobabili basigculisile kulezi zinsuku ezimbalwa ezedlule futhi bobabili basuka kude esikhathini esifishaye kodwa manje sekuqala ukushuba. Sikubheke ngabomvu ukuthola ukuthi ngubani ozonqoba iDriver Search,” kusho uRowe.