I-rally yezithuthuthu isize abampofu
KUHLOMULE abampofu ngokuba khona kwe-rally yokuqala yezithuthuthu eMsinga, ngempelasonto njengoba imindeni engu-20 ehlwempu inikelelwe ngegilosa nezingubo zokulala.
Le rally ebibizwa nge-Impi MCC Bikers Spring Fiesta ibihlelwe yiqembu lezithuthuthu Impi. Ibisingathwe enkundleni yokudlala izimoto iMphelankani khona eMsinga.
UNombulelo Mtshali ovela eMnyangweni wezokuBusa ngokuBambisana nezindaba zoMdabu uthe njengoba besebenzisana neMpi njengoba yingoba umphakathi ukhala ngokuthi basondela uma sekunenkinga.
Uthe bazoqhubeka nokuhambela ezinye izindawo.
Kulo mcimbi bekukhona nowayenguNgqongqoshe wezemiDlalo uNkk Ntombikayise Sibhidla-Saphetha.
Ngemuva kwalo mcimbi kube sekudlulelwa eMphelankani lapho khona bekububula umsindo wezithuthuthu.
Abashayeli bezithuthuthu bamukelwe ngokuhlatshelwa inkomo futhi ebusuku kwaba nobumnandi kwazise bekudlala uDJ Mngadi, Chofy nabanye.
Bekune-pool party lapho bekudanswa kuze kungenwe nasemanzini.
Ngaphandle kokudlala izithuthuthu, umengameli weMpi uphinde wajabulisa abantu ngokushaya izidudla ngegusheshe lakhe nangeBMW M4 yakhe.
Ubegubha iminyaka engu-46 edla anhlamvana futhi uhlabele abantu izinkomo ezimbili.
Njengamanje eMphelankani kulungiselelwa ukusingathwa komcimbi waminyaka yonke, iMsinga Driftkhana.
Eyanonyaka, okuzoba ngokwesithupha ikhona, izpba ngoOkthoba 28. Kulo mcimbi kusuke kushaywa izidudla, kuchushwa phakathi kwamapali futhi izimoto zijika amakhona zidlala ngesinqe.