UGigaba uphawula ngomhlangano weCosatu
UNGQONGQOSHE wezeziMali kuleli, uMnuz Malusi Gigaba uthe ukuhlangana neCosatu kudingidwe ngamahlebezi okuthi umgcinimafa ufuna ukuthatha imali kwi-Public Investment Corporation (PIC) ukutakula izinkampani zikahulumeni akunasidingo.
NgoLwesithathu, uMengameli weCosatu uMnuz Sdumo Dlamini uthe ubhalele uGigaba ecela ukuthi kube nomhlangano ozocacisa ngamahlebezi okuthi uhulumeni uhlongoza ukuthatha imali yabasebenzibakhe egcinwe ezikhwameni zezimpesheni, atakule izinkampani zikahulumeni ezinenkinga yezimali.
Okhulumela uGigaba, uMnuz Mayihlome Tshwethe, uthe lowo mhlangano awunasidingo ngoba uMgcinimafa ukubeke kwacaca ukuthi i-PIC ngeke izitakule izinkampani zikahulumeni.
“Angazi noma lowo mhlangano uzoba khona yini kodwa lolu daba selucacisiwe. Asikho isidingo sokuthi kube nalowo mhlangano. Kungani kumele kuhlanganwe kukhulunywe ngento engeke yenzeke. Angisho ukuthi umhlangano ngeke ube khona kodwa ngithi asikho isidingo sawo. Kumele ubabuze (Cosatu) ukuthi kungani kumele ibe nomhlangano ngongqongqoshe.”
UDlamini, ngoLwesithathu uthe izinyunyana zabasebenzi zinobuhlobo obuhle nongqongqoshe wezezimali, uGigaba useke wakhuluma nobuholi obuphezulu beCosatu. Bavumelana ngokuthi bazobonisana uma kunezinqumo ezithile okumele zithathwe.
Ngesikhathi ebuzwa ukuthi yiziphi lezo zinqumo uthe: “Lokho sizokukhuluma naye (ungqongqoshe). Siyakugwema ukukhuluma ngaye kwabezindaba ngaphambi komhlangano.”
UDlamini uthe uyakwamukela okushiwo uGigaba mayelana nokuthi i-PIC ngeke izitakule izinkampani zikahulumeni kodwa iCosatu isafuna ukuhlangana naye.