Malume wangilimaza: umgilwa
“MALUME, wangilimaza ngempela.” Lawa ngamazwi alotshwe yilungu lomndeni womculi wekwaito, uSipho “Brickz” Ndlovu, olahlwe yicala lokulidlwengula.
Lawa mazwi asembikweni othulwe ngabashushisi ngesikhathi kundlalelwa ukugwetshwa kukaBrickz enkantolo yemantshi eRoodepoort izolo.
UBrickz walahlwa yicala lokudlwengula isihlobo sakhe esanukubezwa sineminyaka ewu-16 ngoJulayi 7. Ubegqoke isudi emnyama izolo ngesikathi kufundwa incwadi echaza ngobuhlungu okwadlula kubo umgilwa ngenxa yalesi sehlo esenzeka ngo-2013.
“Malume wangilimaza ngempela. Ngiyazibuza ukuthi ngakwenzani uze ungidlwengule. Ngangifuna ungiphathe njengendodakazi yakho kodwa awukaze ukwenze lokho. Ngeke ngisazigqaja ngempilo yami futhi ngeke ngisathemba muntu. Ngizokhumbula le nto impilo yami yonke,” kusho amazwi abhalwe embikweni womgilwa.
Ngaphambi kokuthi abashushusi bethule umbiko, usonhlalakahle osebenza emajele, u-Annette Vergeer, wethule umbiko ngoBrickz ozolekelela inkantolo uma isithatha isinqumo ngenyanga ezayo. UVergeer uthe uBrickz wakhula ngendlela ejwayelekile yize waphikwa nguyise esemncane. “Wakhuliswa wugogo wakhe nonina kodwa bashona bobabili ngo-2003. Lokhu kwamphoqa ukuthi akhule ngokushesha akhulise abafowabo,” kusho uVergeer. Uthe uBrickz kumele athole isigwebo esimufanele esizokwazi ukwenza nabanye bakugweme ukwenza iphutha elifanayo. Ummeli wakhe, uMnuz Piet Du Plessis, ucele inkantolo ukuthi ingamnikezi uBrickz isigwebo ngoba izama ukwenelisa izikhalo ezivela emphakathini. Kulindeleke ukuthi agwetshwe ngo-Okthoba 17. THUMELA umbono ngalolu daba kuFacebook (Isolezwe), kuTwitter (@isolezwenews) noma umqhafazo ku-45773. I-sms ibiza R1,50.