Kulindeleke izinkumbi koweLembe
KULINDELEKE ukuthi amabutho aphume kuzo zonke izinkalo zaKwaZulu-Natal aqungele izimo zezulu ayogubha uMkhosi weLembe othathwa njengeminye yemikhosi emikhulu.
Kusuke kukhunjulwa umbumbi wesizwe amaZulu, iSilo uShaka kaSenzangakhona.
Izanusi zezulu ziqagula ukuthi lizobe libafazi bedube inyama ngosuku lwalo mkhosi ozobe uKwaDukuza, ngeSonto.
UNkk Jacqueline Modika oyisangoma sezulu esingayidli imbumba uthe kulindeleke ukuthi amazinga okushisa abe phansi kakhulu ngalolu suku.
“Kuzoba kunamafu esibhakabhakeni. Amazinga okushisa kulindeleke ukuthi abe ngu-13 degrees, aphansi kanti aphezulu ayoba ngu-18 degrees,” kusho uNkk Modika.
Umgubho weLembe wenziwa minyaka yonke, uzobuyela KwaDukuza lapho okwabe kunesigodlo seSilo uShaka. Itshe lesikhumbuzo seLembe likuyo le ndawo.
Ngonyaka owedlule umcimbi wabe usenkundleni iMoses Mabhida kwazise ubuhlanganise nokugujwa kweminyaka engu-200 kwabunjwa amaZulu.
UMnyango wezoBuciko namaSiko esifundazweni oholwa nguNkk Bongiwe Sithole-Moloi uthembise ukuhlinzeka ngamabhasi angu-100 namatekisi angu-21, alungiselelwe ukuthatha mahhala abafisa ukuya emgubhweni abasuka kuMasipala iKing Cetshwayo, Zululand, eThekwini, Harry Gwala, Mzinyathi, Amajuba, Ugu nakuMasipala uThukela. Kuzophinde kukhishwe izitimela ezine ezizobe zisuka KwaMashu, KwaMnyandu, Dalbridge naseMlaza ezizosuka ngo-8 ekuseni zibuyele emuva ngo-3 ntambama.
ISilo samabandla uGoodwill Zwelithini Zulu, kulindeleke ukuthi sethule inkulumo yosuku. Umnyango uveze ukuthi umdlalo wezinsizwa, umgangela uzobe ungavumelekile ngalolu suku. THUMELA umbono ngalolu daba kuFacebook (Isolezwe), kuTwitter (@isolezwenews) noma umqhafazo ku-45773. I-sms ibiza R1,50.