Ukhathazwa ngabangcolisa abaholi
UDKT Zweli Mkhize ongomunye wabaholi be-ANC abazongenela ukhetho lokuhola le nhlangano ngoDisemba ukugxekile ukusetshenziswa kwamaqhinga angcolisa amagama abanye abaholi uma kukhankaswa.
UMkhize uthe akulungile ukuthi kukhulunywe esidlangaleni ngePhini likaMengameli we-ANC, uMnuz Cyril Ramaphosa, elisolwa ngokujola nenqwaba yezintokazi.
Engxoxweni ekhethekile ne-Independent Media ngoLwesithathu, uMkhize uthe kuyakhathaza ukuthi kunabantu abadicilela phansi isithunzi sabaholi be-ANC ukuze bafeze izinhloso zabo.
“Akufanele kusetshenziswe imininingwane efihliwe yomuntu uma kukhankaswa ngoba leyo nto idicilela phansi isithunzi somholi nesenhlangano,” kusho uMkhize.
NgoLwesibili, uNobhalaJikelele we-ANC uMnuz Gwede Mantashe ukukhuzile ukusetshenziswa kwamaqhinga angcolile uma kukhankaselwa ukhetho lwe-ANC.
Uthe lokhu kuzobulala i-ANC nokuthembeka kwayo kubantu.
UMkhize uthe ukusetshenziswa kwemininingwane efihliwe akuyona into ejwayelekile uma kuyiwa okhethweni lobuholi be-ANC.
“Asikaze siyibone into enjena, akujwayelekile ukuthi abantu basebenzise izindaba zangasese zabanye. Izindaba ezivezwayo njengamanje zikhombisa ngokusobala ukuthi kunomkhankaso wokungcolisa amagama abaholi,” kusho uMkhize.
Uphinde waveza ukuthi babekhathazekile ngo-2006 ebuholini bowayenguMengameli we-ANC, uMnuz Thabo Mbeki, ngesikhathi uMengameli Jacob Zuma owayeseyiphini ngaleso sikhathi ethweswa amacala okudlwengula.
UMkhize ukubeke kwacaca ukuthi naye uzongenela ukhetho lokwengamela i-ANC ngoDisemba.
UMkhize uthe ukulungele ukuhola i-ANC uma amagatsha emqoka ngenyanga ezayo.
“Okuhle ukuthi abantu bavumelekile ukuthi bakhulume ngakho konke ngaphambi kokuthi kuqokwe abaholi. Engingakusho ukuthi uma ngiqokwa ngikulungele ukuba sebuholini. Ngikhona noma ngabe yikusiphi isikhundla engiqokelwa kusona,” kusho uMkhize.
NgoJulayi isifunda i-Alfred Nzo e-Eastern Cape saphakamisa igama likaMkhize ukuthi kube nguye ongena esikhundleni sikaMengameli Zuma uma esethathe umhlalaphansi.
Igama likaMkhize liyavela nasohlwini lwabantu abahambisana noRamaphosa.
Kunezinsolo zokuthi ukhetho lobuholi lwangoDisemba luzoba nenkohlakalo njengoba kukhona abakhala ngokuthi amavoti azothengwa.
UMkhize uthe akumele idayiswe ingqungquthela wathi akekho umholi ozongena esikhundleni sokwengamela i-ANC ngokuthenga amavoti nokugwazela abantu.
“Uma sekuyiwa okhethweni akufanele kube nomuntu obhukhela izithunywa amahhotela ngoba efuna ukufeza izinhloso zakhe. Akufanele ube nesimo lapho abantu abanemali begwazela amaqabane angenamali ukuze bavotelwe. Sifuna ukusiqeda leso simo,” kusho uMkhize.