Ucwaningo ngokugula kothisha
ABAFUNDI abayimidlwembe, ukugcwala ngokweqile kwamakilasi, umsebenzi omningi wokumaka ngezinye zezinto ezenza othisha abaningi balashelwe ukhwantalala nengcindezi.
Lokhu kushiwo yizinyunyana zothisha KwaZulu-Natal ocwaningweni olwenziwe umnyango wezemfundo esifundazweni oluveze ukuthi u-61% wothisha uguliswa wukhwantalala.
Umnyango uphenya necala likathisha okuthiwa usehlale ekhaya izinsuku ezingu-2 027 okusho ukuthi usebe elivini yokugula iminyaka emihlanu.
U-Advocate Bheki Masuku, oyiPhini likaMqondisi jikelele emnyangweni, uthe othisha abelashelwa ukhwantalala kakhulu yilabo abasemalivini amade okugula.
Uthe lolu cwaningo abalwenzile luveza ukuthi u-17.8% wothisha abagulayo basuke benezifo ezithinta ukuphefumula okungaba yisifo sofuba nezinye.
“U-10% uguliswa yizifo ezithinta umgogodla kuthi u-10.3% ube nezifo ezihambisana nenhliziyo. U-0.9% uphethwe wukukhathala okungapheli. Bangu-81 othisha abasemalivini amade okugula, kulaba abawu-64 ngothisha abakupost level 1, abayisishiyagalombili othishanhloko, abanye abayisishiyagalombili kube izinhloko zeminyango.” UMnuz Allen Thompson, iPhini likaMengameli weNatu, uthe mkhulu umthwalo osemahlombe othisha yingakho begula. Uthe uke uthole uthisha efundisa amabanga amathathu, afundise amakilasini amahlanu kuya phezulu. “Ekilasini elilodwa uthola kunabafundi abangu-60, kumele abanike umsebenzi aphinde abamakele. Uthola ibanga ngalinye linamakilasi amane nabafundi abangu-600. Uthole ukuthi ubheke ikilasi, wenza namashedula namaripoti. Ngeke ungaguli wenza umsebenzi ongaka,” kusho uThompson.
Ukuchithile ukuthi bazigulisa ngoba befuna ukudla imali yemishwalense. Uthe uma abafundi bengaphasi uthishanhloko uhlala phezu kukathisha yingakho inqwaba egulayo kungothisha abango-post level 1.
UMnuz Bheki Shandu, iPhini likaNobhala weSadtu, ukhale ngokuthi enye yezinto eyenza othisha bagule wukumiswa isikhathi eside bephenywa.
“IThandile, okuyiyo ecubungula indaba yalabo abagulayo ithatha isikhathi eside. Uthisha uzithola egula kakhulu kodwa anganikwa impesheni yokuhlala ekhaya ngoba engasakwazi ukuqhubeka asebenze. IThandile iyona enezwi lokugcina ngokuthi uthisha uhlala ekhaya noma ubuyela emsebenzini,” kusho uShandu.
UMasuku uthe iThandile, wuhlelo lukahulumeni kazwelonke okusetshenziswa odokotela balo kanti bezwa ngalo ngezinto ezithinta ukugula kothisha.
Amalungu ekomiti lezemfundo esiShayamthetho afuna kube nomhlangano nabakwaThandile ukuze kutholakale ukuthi yini ebamba ukuthi othisha banikwe impesheni yokugula ukuze kungakhokhelwa abantu ababili esikhaleni esisodwa.
Uma uthisha ehlabe ikhefu lokugula kuqashwa omunye uthisha esikhaleni sakhe.