Akazisoli ngemali ayikhiphe ngoCoetzee
AKAZISOLI ngokukhipha izindodla ngoRivaldo Coetzee umqeqeshi weMamelodi Sundowns uPitso “Jingles” Mosimane.
Lokhu ukusho ngesikhathi exoxa naleli phephandaba eChloorkop ngemuva komdlalo wezakhe wesihle nePolokwane City. NgoLwesine olwedlule iSundowns iqede yonke into noCoetzee olimele. Usayine inkontileka yeminyaka emihlanu neqembu okuyinto uMosimane azishaya isifuba ngayo.
“Uma kunomdlali oneminyaka engu-20 futhi obonayo ukuthi isitayela sakhe singahlala khaxa kwesakho awukwazi ukumyeka. Ibhola ngumdlalo wosomathuba. Uma kunomdlali okanjalo emakethe akumele wenze iphutha lokumyeka. Ngiyazi ukuthi nginabadlali abahlanu abadlala phakathi nenkundla emuva kodwa umbuzo uthi wenzenjani? Uyamyeka umdlali elahlile?
“Lo mfana esikhuluma ngaye usezingeni lokudlala e-Europe. Uke waya kwi-Ajax Amsterdam kanti umqeqeshi weCeltic uBrendon Rodgers ukhuluma kahle ngaye. Lo mfana unesipiliyoni sokudlala ezingeni lomhlaba. Ngizibuzile ukuthi angadlala kwiChampions League, impendulo ngisheshe ngayithola. Yebo angadlala. Nakanjani uzoguga iphakethe uma umfuna,” kusho uMosimane.
UCoetzee uphuthwe yithuba lokuyodlala phesheya kwezilwandle. Ubesevumele ngayo yonke into neCeltic yaseScotland kodwa wafeyila izivivinyo zodokotela kwazise kutholakale ukuthi ulimele.
“Ngesikhathi sisayinisa uKhama Billiat esuka kwi-Ajax Cape Town saguga iphakethe. Ngicabanga ukuthi senza irekhodi ngokukhipha imali enkulu. Uma ngizibuza ukuthi ngabe ngathatha isinqumo esifanele ngiyayithola impendulo. Usesiwinele izicoco eziyisithupha. Eminyakeni emihlanu wenze izinto ezinkulu. Asiyimoshanga imali. Eminyakeni eyedlule ukube ngabuzwa ukuthi ungawukhokha u-R7 million ngomdlali othize yena ezokwenza izinto ezinkulu, ngingasho ngingananazi ukuthi yebo.
“Ukube ubengadlali ngabe siyazisola. IBarcelona yakhipha izizumbulu ithenga uNeymar eBrazil. Ngabe iBarca iyazisola? Nakanjani ayizisoli,” kusho uMosimane.
UCoetzee (20) usedlale imidlalo engaphezu kuka-20 kwiBafana Bafana. Lesi sitobha sesike sayibamba kwi-Africa Cup of Nations (Afcon) ngo-2015 e-Equatorial Guinea.
“Kumasizini edlule sathenga uKeagan Dolly kwi-Ajax emncane. Wonke umuntu wayebabaza ethi ungayikhokha kanjani kodwa imali engaka. Buka ukuthi ukuphi manje umfana. Senza isinqumo esihle kakhulu ngokumsayinisa. Iqembu lenze enhle imali selimdayisa. Usisizile sawina iligi, Champions League neTelkom Knockout. UBongani Zungu naye ngamthola emncane. Abantu bababaza imali esamthenga ngayo kumaTuks. Uwine amaligi amabili neqembu, Nedbank Cup neTelkom Knockout.
“NoRivaldo angingabazi ukuthi uzolandela ezinyathelweni zalaba badlali. Anginaso isiqiniseko sokuthi unawo yini umbandela uma efunwa ngamaqembu aphesheya. Uneminyaka engu-20 futhi usedlale kwi-Afcon. Ukusayinisa umdlali ofana naye kuyalikhulisa iqembu,” kusho uMosimane.
UMosimane uphahlukile ngokuthi ukhokhe u-R9 million ukuze athole uCoetzee.
“Indaba yokulimala kukaRivaldo izolungiswa. Ngeke ahlale izinyanga eziyisishiyagalolunye njengoba bekubikiwe. Ungoti esimtholile uveze ukuthi akumele ahlale isikhathi eside kangaka. Mhlawumbe uzohlala izinyanga ezintathu. NeBarca yingakho ikhiphe le mali eyikhiphile ngoOusmane Dembele. Uma umdlali eseqophelweni eliphezulu futhi emncane akumele ugodole nemali,” kusho uMosimane.
Ngonyaka edlule uCoetzee ubedlala kuma-Olympic Games.
“Ngesikhathi ngisekwiSuperSport United ngakhipha u-R500 000 ngithenga uDenis Masina. Wafika lapha eneminyaka engu-18. Ngemuva kwamasizini amathathu samdayisa phesheya. UTeko Modise ngamthenga ngo-R600 000 kwiCity Pillars. Ngazishayelela mina ukuyomthenga. UPatrick Mayo ngamthenga ngo-R650 000 kuMthatha Bucks ngisacija iSuperSport. Ngaleso sikhathi kwakungathi ukhiphe u-R9 million. Kade ngangithenga abadlali ngemali eshisiwe bafike benze kahle,” kusho uMosimane.