Ithemba kwiBafana yize ilahle amaphuzu
KUBUYE ithemba kwiBafana Bafana ngemuva kokulahla amaphuzu ekuhambeni seyibona amaqembu ebanga nawo edlala ngokulingana.
IBafana ihlulwe yiCape Verde ngo 2-1 emdlalweni kaGroup D ngoLwesihlanu ebusuku.
NgoMgqibelo ebusuku iBurkina Faso ibambele ekhaya iSenegal umdlalo uphela ngo 0-0, okuwumphumela obuyise ithemba kwiNingizimu Afrika ngokuya kwiNdebe yoMhlaba eRussia ngo2018.
Ngokwalo mphumela iBurkina Faso iqhwakele kuleli qoqo ngamaphuzu amahlanu. ISenegal neBafana sebeyalingana ngamaphuzu amane.
IBafana sekumele iyiwine yonke imidlalo yayo, owakusasa, ezowudlala neBurkina Faso kuleli ngo-Okthoba nowasekuhambeni neSenegal ngoNovemba, ukuzibeka ethubeni elihle lokuya eRussia.
Umqeqeshi weBafana, uStuart Baxter, utshele abezindaba izolo eMhlanga ukuthi ube nomhlangano nabadlali lapho bebhunge ngobumqoka bokunqoba umdlalo womlenze wesibili neCape Verde.
INingizimu Afrika izokwamukela leli qembu eliyivukele esiswini njengotshwala emdlalweni okusasa eMoses Mabhida Stadium ngo-7 ebusuku. Ukube iBafana ayibhacazanga ngoLwesihlanu ngabe iyona esesicongweni. Khona kusasa iBurkina Faso izokwamukela iSenegal e-Ougadougou. “Umphumela ubuphoxa, okuyinto okumele siyiguqule. Wonke umdlalo esisuke siwudlala sisuke sibheke ukuwunqoba. Kulokhu asiwatholanga amaphuzu amathathu. ISenegal neBurkina Faso babambane ngo 0-0, okuyinto esibuyisele embangweni,” kusho uBaxter.
Iqembu elizoqeda liqhwakele eqoqweni ngoNovemba uma sekusongwa imidlalo yokuhlunga yilona elizoya eRussia.
UBaxter uthe akalona uhlobo lomqeqeshi oluzikhathaza ngokwenza izibalo kodwa okusemqoka wukubhekana nomdlalo ngamunye.
“Nginesipiliyoni esanele sokwazi ukuthi akufanele ngizikhathaze ngokwenza izibalo ngoba ebholeni kungenzeka noma yini. Okusemqoba wukubhekana nenselelo ngayinye.”
Uthe inselelo anayo njengamanje wukuqinisekisa ukuthi kufika usuku lomdlalo iqembu selikulungele ukudlala.
Izolo ekuseni iBafana ayizange iziqeqeshe, izilolonge izolo ntambama eMoses Mabhida. Isizathu salokhu uBaxter uthe wukuba nohambo lwamahora angu-16 abe nobuhixihixi, okubambezele isikhathi abafike ngaso kuleli.
“Amalungiselelo awahambi ngendlela ebengifisa ngayo kodwa kumele simelane nesimo. Sikhulumile nabadlali ngokuthi sizozibuyisa kanjani izinduku. Ngabe umphumela omuhle siwulambele ngale ndlela yokuthi sizimisele ukwenza konke ukuze siwuthole?” uBaxter ezibuza.
Ngokubona kwakhe iBafana ayizange ibe nomdlalo omubi ngaleyo ndlela ngoLwesihlanu. Kodwa ukuvezile ukuthi uzozenza nezinye izinguquko ngaphezu kuka-Eric Mathoho owathola ikhadi elibomvu. UThulani Serero ukulungele ukudlala, yize iqembu lakhe iVitesse lalithe uthinteke umsipha.
Lokhu ukusho ngemuva kokubuzwa ukuthi kungenzeka yini kubonakale u-Andile Jali eqala umdlalo esiswini.
“ICape Verde kungenzeka ihlale emuva kunalokhu ebiyikho. Nathi sizokwenza izinguquko, sidlalise iqembu elihlaselayo. Kungenzeka kubekhona ushintsho esiswini, isemuva, iphambili ngisho emapalini. Angicabangi ukuthi besinenkinga maphakathi nesisu. Ngicabanga ukuthi uDean (Furman) udlale kahle. UBongani (Zungu) akazange abe nomdlalo omuhle. Kungenzeka ukuthi yena no(Lebohang) Manyama ukuhlangana kokuthengwa kwabo ngemizuzu yokugcina kubaphazamisile. UDean noBongani badlala kahle kwiNigeria ngakho angiliboni iphutha ngokubaqalisa. Kodwa ke wonke umuntu unomdlali wakhe amthandayo, ngeke ngikwazi ukujabulisa bonke abantu,” kusho uBaxter.