UTinkler imkhonzile iNedbank ajwayele ukwemuka nayo
Ke Yona Team (0) 1 IYAMTHANDA iNedbank umqeqeshi weSuperSport United, u-Eric Tinkler.
UTinkler uhole aMatsatsantsa a Pitori ngempumelelo izolo ntambama eMakhulong Stadium, eTembisa.
ISuperSport ithele othulini iNedbank Ke Yona Team ngo 2-1. Amagoli aMatsatsantsa a Pitori abaselwe enethini nguThuso Phala no-Aubrey Modiba kwathi elokubika leKe Yona lashaywa nguZanoxolo Mduli.
Ngo-2010 uTinkler ubesebhetshini ngesikhathi iBidvest Wits ikhala yemuka nesicoco seNedbank Cup. Ngaleso sikhathi wayeyiphini likaRoger de Sa. Babhudluza AmaZulu ngo 3-0 eFNB Stadium, eGoli.
Ngo-2014 uTinkler uphinde wathola enye indondo yegolide ne-Orlando Pirates emqhudelwaneni ofanayo. KwiBucs wayesiza uVladimir Vermezovic ngesikhathi bexubula iWits ngo 3-1 eMoses Mabhida Stadium, eThekwini.
Ngonyaka edlule uTinkler uthole indondo yesiliva ngesikhathi iPirates ishaywa yiSuperSport kowamanqamu weNedbank Cup.
ISuperSport izibekisele indawo kwiNedbank Ke Yona Challenge ngokudla umhlanganiso kwiNedbank Cup. Ngonyaka odlule iSuperSport iyona enqobe iKe Yona Challenge. UTinkler uqale ngeqembu eliqinile kwazise ubebophele uReneilwe “Yeye” Letsholonyane, Siyabonga Nhlapo, Tebogo Mokoena, Thuso Phala noKingston Nkhatha. Kulo mdlalo kubonakale uSifiso “Nsunda” Myeni.
Ngomzuzu ka-37 uThuso Phala ulibasele enethini ngemuva kwephutha likJabu Hlongwane.
Sekusele imizuzu emibili kuyiwe ekhefini uModiba owethulwa eqenjini leKe Yona Team eminyakeni eyedlule ungqofele enethini igoli lesibili ngemuva kwelihle ibhola abeligotshelwe nguNhlapo.
UMakhosandile Plaatjie oyozama inhlanhla neLamontville Golden Arrows ucishe walithola igoli lokuqala leKe Yona Team kodwa waphikiswa yipali. Ligcine liqhamukile ngesikhathi uMondli Mpoto enza iphutha ehlulwa wukubamba ibhola elilula, uMduli waphasela inethi.