Kugqugquzelwe intsha ngezemidlalo
okuwuPhongolo, Ulundi, Nongoma, Dumbe naBaqulusi, ishaye into ecokeme kwezemidlalo okukhona kuzona isibhakela, volley ball, ibhola lezinyawo, ikhilikithi nokunye. Imidlalo iqala emawadini lapho kuqokwa khona izikwati ezigcina zimele oMasipala kwiZululand District Mayoral Cup.
IMeya yaseZululand, Inkosi uMzamo Buthelezi, iqinise idolo intsha ngokuthi uma izimisela ngezemidlalo ingasishintsha isimo sasemakhaya kwazise sezingenye yezindlela zokuziphilisa.
“Ezemidlalo zihlanganisa abantu abaqhamuka ezindaweni ezahlukene. Njengomkhandlu sitshala entsheni ngoba siyakuqonda ukuthi sekuyaphileka ngazo,” kusho uButhelezi.
“Imidlalo iqala emawadini nalapho amakhono eqala ukuthuthukiswa khona. Ukuphuma kwentsha ebalelwa ku-2500 kukhombisa khona ukuthi abantu baseZululand bayazinikela. Siyazi ukuthi asimile kahle njengabanye omasipala kodwa ngiyakholwa ukuthi kuma-Salga sizokwenza kahle. Thina sinamandla futhi siqatha kunabasuka kuyona. Kufanele sisebenzise lokho njengesikhali. Isifiso sethu wukuthi sikhule isibalo sentsha eqhamuka eZululand enyukela ezingeni eliphezulu kwezemidlalo ezahlukene.”
KwiMayoral Cup, uMasipala uPhongolo yiwona odle umhlanganiso uma sekuhlanganiswe yonke iminxa. UPhongolo luwine kwikhokho yabesilisa neyabesifazane, volley ball yabesifazane, umlabalaba, dance sport, table tennis, tennis, nesibhakela. IDumbe iphume endaweni yesibili iwina kwinetball yabesilisa neyabesifazane, volley ball yabesilisa, nakwikarate. Endaweni yesine kuphume uLundi oludle umhlanganiso emdlalweni wengqathu, nakwirugby yabesilisa neyabesifazane.