Kuphele ithemba konenkinga yesikhumba
USELAHLEKELWA yithemba lokwelapheka owesilisa (29) waseVryheid onenkinga yesikhumba engajwayelekile noseqede abelaphi bendabuko nezibhedlela ezama ukuthola usizo.
UMnuz Wonder Malaoaneng waseVryheid usephelelwe yithemba lokuthi isikhumba sakhe sizobuyela esimeni. Uthe ugcwele amaqhuqhuva emzimbeni wonke nezinzipho zakhe zikhula ngokushesha kube sengathi ezesilwane.
Ngokusho kwakhe lokhu kuqale eminyakeni emithathu eyedlule.
“Ngiqale ngokuthi ngibe nenkinga yezinzipho ezivele zashintsha umbala zaba mnyama kwaba sengathi ezesilwane. Zavele zaqina, zakhula ngokweqile kwaze kwaba nzima nokuzinquma. Namanje zisekuleso simo. Isikhumba sami sibe sesishintsha naso saba namaqhubu okungathi ameva ahlabayo abuhlungu. Angilali ngenxa yobuhlungu obungabekezeleki,” kuchaza uMalaoaneng.
Uthe ngesikhathi ebona isimo sesikhumba sakhe siya ngokuba bucayi, uye kubelaphi bendabuko wazama ukuthola usizo kodwa nabo bangakwazi ukuyiqeda inkinga yakhe. Ube eseya emtholampilo nabo bamdlulisela ezibhedlela nazo ezingakwazanga ukumsiza.
Uthe ngonyaka odlule uye kwelinye ibandla ebelivakashe ngakubo, bamthandazela, bamnika amatshe abathi akawafake emanzini bese egeza ngawo. Uthe kube sengathi kuyaphela kodwa manje sekuqale phansi.
“Angisazi ukuthi ngizokwenzani ngoba nalelo bandla alisekho. Sengifisa sengathi kungaba khona umuntu ongathi useke wayibona le nto futhi angakwazi ukuyelapha ngoba impilo yami imile. Noma ngiphuma abantu bayangibuka babuze ukuthi nginani. Kwamina angazi ukuthi yini ngoba ezibhedlela bahluleka bethi bazama ukuhlola ukuthi yini. Bathatha izicubu bathi abatholi lutho,” kusho uMalaoaneng.
Uthe waphoqeleka nokuthi ayeke umsebenzi wokushisela ngoba ehlushwa yizinhlungu ezingabekezeleleki ezidalwa yisimo sakhe. Lokhu kusho ukuthi akakwazi ukunakekela indodakazi yakhe.