Sihalalisela Amageza Amahle ngokumuka nesicoco seNgqwele
KUQOPHEKE umlando ngoMgqibelo iqembu likamaskandi Amageza Amahle liba ngabaculi bokuqala ukuthatha isicoco somqhudelwano wabaculi bamaskandi osungulwe yiSolezwe, Ingqwele kaMaskandi.
Sithi halala kuMageza Amahle nakubalandeli bawo abaqinisekisile ukuthi ahamba nesicoco njengoba bekukhuluma ivoti kulo mncintiswano obuwethulwa nonyaka.
Inhloso yomqhudelwano wukuthi iphephandaba lijabulise abalandeli bomculo kamaskandi nokubanika ithuba lokuzikhethela ingqwele kulo mculo ngokuthi bavote.
Siyabonga kakhulu ngendlela eniwamukele ngayo umqhudelwano. Ube nesasasa ngendlela eyisimanga futhi kucacile ukuthi umaskandi uyimfivilithi kubafundi bethu.
Amavoti abaculi abangene ohlwini lwabangu-10 abebevotelwa abelokhu engene njalo kodwa kwacaca ukuthi abalandeli bezeNdidane bafuna iqembu labo liwine.
Umcimbi wokubeka ingqwele kamaskandi obuseCentrum Park, eWorkshop ngoMgqibelo nawo ube yimpumelelo enkulu.
Okugqamile nokube kuhle kulo mcimbi wukuheleza komoya wokuthula kucaca ukuthi abantu bazele umculo hhayi ukuzosusa uchuku.
Siyabancoma futhi siyababonga abebesemcimbini ngokuziphatha kahle bayiqeda inkolelo yokuthi lapho kuhlangene khona abalandeli bamaskandi kuba nodlame nokungaziphathi kahle.
Sengathi le ndlela abaziphathe ngayo ingaqhubeka njalo nasemicimbini elandelayo.
Siyababonga abaculi nezinduna zabalandeli abebelokhu belishumayele njalo ivangeli lokuthi kube nokuthula emcimbini.
Nembala akubanga khona ukuchukuluzana okuvame ukususa uthuthuva.
Umcimbi ubumnandi kakhulu, impela obengekho uphuthelwe.