Umfundi ugwaze othisha ababili esikoleni
UBOSHIWE umfundi waseTshanibezwe High, eBergville, okuthiwa ugwaze othisha ababili ngoLwesine ngemuva kokucasulwa wukuthi akamtholanga uthisha abemfuna.
Umfundi (18) kuthiwa uye kofuna uthisha othile kodwa wangamthola. Uthe uma engamtholi wase edonsa ummese wagwaza uthisha abekhuluma naye.
Uthisha umgwaze ngoba ethe akekho lo abemfuna. Uthisha wesibili ubezama ukungenelela ngesikhathi kwenzeka lokhu naye ube esethelwa amachaphazelo, wamgwaza naye. Okhulumela uMnyango wezeMfundo esifundazweni, uMnuz Sihle Mlotshwa, uthe umbiko abawutholile uthe umfundi ugwaze othisha ngemuva kokungamtholi abemfuna.
“Umbiko esinawo okwamanje uthi othisha basesibhedlela. Inhloko yomnyango uDkt Nzama (Vusumuzi) uzohambela isikole namhlanje ekuseni eyothola ukuthi kwenzekeni. Siyasigxeka isenzo esifuze lesi,” kusho uMlotshwa.
Okhulumela amaphoyisa, uCaptain Nqobile Gwala, uthe umfundi uboshwe ngoLwesihlanu wathi kulindeleke ukuthi avele enkantolo namhlanje.
UMnuz Bheki Shandu, iphini likanobhala weSadtu, uthe ngokuthola kwabo isehlakalo senzeke phambi kukanogada wathi onogada kumele kube ngabantu abanikwa izinsiza zokusebenza bangavuli bavale isango kuphela.
Uthe kumele umnyango uqhamuke nezinhlelo zokunqanda izehlakalo ezifuze lezi.
“Kumele sazi ukuthi yiluphi usizo oluzonikwa lesi sikole ukuze isimo esinje singaphinde senzeke,” kusho uShandu.
UMnuz Allen Thompson, iphini likamengameli weNatu, usigxekile lesi senzo wathi abafundi bavele bayazenzela kothisha.
Uthe uma bethanda bayabashaya, abanye babasabisa ngisho nangezibhamu.
“Inhlangano yabafundi iCosas ike yakhipha umyalelo wokuthi abafundi abashaye othisha ngoba kusho ukuthi othisha izinto zokudlalela nje. Indaba yezokuphepha sihlale siyikhuluma njalo. Sifuna ukubona okuzokwenziwa wumnyango,” kusho uThompson.