Kubheduke impi yezigodi kwavalwa isikole KwaNongoma
SIVALIWE isikole samabanga aphakeme iMshanelowesizwe, KwaNongoma, ngemuva kokubheduka kwempi yezigodi ezimbili egcine isikapakele esikoleni.
Ngokuthola kweSolezwe, kunempi ephakathi kwezigodi ezimbili, eThokazi naseSiqokolweni eqhubekayo okungacaci ukuthi isuswe yini.
Kuthiwa impi yezigodi abafundi sebeyiqhuba ngisho nasesikoleni. Kuliwe ngoLwesibili kwaze kwagcina sekugwazwana, kwalimala umfundi kanzima. Isolezwe lithole nokuthi uthishanhloko wesikole naye uthole amachaphazelo ngemuva kokuthi abanye abafundi abalwayo bebaleke bangena ehhovisi lakhe.
Ikhansela lendawo, uNkk Nokubekezela Xulu, oyiPhini leMeya kuMasipala waKwaNongoma, lithe bazwile ngokuhlaselana kwabafundi eMshanelowesizwe High.
UNkk Xulu uthe bathumele amaphoyisa ukuba ayoqapha isimo esikoleni ngemuva kokubheduka kwempi.
“Sizwa sengathi kunezigodi ezimbili ezilwayo manje impi yazo isikapakela nasesikoleni, asikatholi ukuthi kubangwani,” kusho uNkk Xulu.
Uthe kuleli sonto uzohlangana nezinduna, othisha nomphakathi kuzanywe ukubhula umlilo.
Uthisha wakulesi sikole, ocele ukungadalulwa, uthe kusukela kusuke impi ngeledlule abalubhadi esikoleni.
“Silinde kubizwe umhlangano wabazali lapho kuzophuma khona isinqumo sokuthi kuzokwenzekani,” kusho uthisha.
Okhulumela amaphoyisa KwaZulu-Natal, uLt Colonel Thulani Zwane, uthe amaphoyisa akwaNongoma aphenya icala lokushaya ngenhloso yokulimaza ngemuva kokuthi umfundi oneminyaka ewu-17 egwaziwe ngaphandle kwamagceke esikole ngoLwesibili.
UZwane uthe umfundi (22) osolwa ngalokhu uboshiwe wavela eNkantolo yeMantshi yaKwaNongoma. Ugcinwe ezitokisini.
Okhulumela uMnyango wezeMfundo KwaZuluNatal, uMnuz Muzi Mahlambi, uthe kubaphatha kabi ukuthi uma kuqhubeka izimpi zezigodi kugcina sekuphazamiseka inhlalo yabantu nokufunda.
UMahlambi uthe basebenza ngokubambisana nezinhlaka zomphakathi kubalwa nezinduna ukuthola isixazululo. Uthe okubaphatha kabi kakhulu wukuthi lokhu kwenzeke ngesikhathi sekusele izinsuku eziwu-56 kuqale ukubhalwa kwezivivinyo zika-matric.