UKomphela angase ashintshe umqondo ngoKatsvairo
IKAIZER Chiefs isikaza ukujika umqondo ngomgadli waseZimbabwe uMitchell Katsvairo ekupheleni kwesizini ofakwe ohlwini lwabadlali abangekho ezinhlelweni zomqeqeshi waMakhosi uSteve “Mphathi” Komphela.
Isolezwe lihabule izindaba zokuthi uKomphela engase ajike umqondo ngoKatsvairo ofike kuMakhosi kubhekwe lukhulu kuyena.
Lo mgadli waseZimbabwe uqale isizini edlule kunguyena ozitamuzela ngesikimu kubagadli baMakhosi. Phakathi nesizini ulimalile. Isiwombe sesibili size saphela engakaze adlale.
Imenenja kaKatsvairo, uMichael Ngobeni, we-M-Sport Management okuyinkampani ephethe izindaba zalo mdlali, iqinisekisile kwiSolezwe ukuthi uKomphela angase ashintshe umqondo ngalo mgadli. “Kuze kube manje iChiefs ayikezi kithi iveze ukuthi kuneqembu esilitholele uMitchell. Umqeqeshi ucele ukuthi aphinde ambone kahle kule midlalo yokulungiselela isizini entsha. Ngempelasonto edlule udlalile kwiMaize Cup. Kule mpelasonto uhamba neqembu uya eBotswana. Umdlali ulambile, uzimisele ngokukhombisa umqeqeshi ukuthi ukufanele ukuhlala ngesizini ezayo. UMitchell ungumuntu ngakho indaba yokufakwa ohlwini lwabadlali ababolekiswayo yamthinta emoyeni kodwa konke lokho usekudlulisile manje njengoba umqeqeshi ezimisele ngokumnika ithuba. Ukulimala kumphazamisile ngesizini edlule. Uyaqonda futhi ukuthi iChiefs yiqembu elikhulu ngakho kumele ubekezele ngoba inabadlali abaningi abaseqophelweni eliphezulu,” kusho uNgobeni.
UVina Maphosa wezokuxhumana kwiChiefs ethintwa ngale ndaba uthe ngeke akwazi ukukhulumela umqeqeshi. “Ngeke ngikwazi ukukhulumela umqeqeshi. Ithuba lokubuza imibuzo emayelana nokuthi abadlali abathize abebafake ohlwini lwabadlali abachithwayo yini uzobanika yini ithuba lizovela ngo-Agasti uma sesibiza isithangami nabezindaba sokwethula abadlali abasha. Umdlali ujima neqembu ngoba usanenkontileka nalo. Okwamanje alikho iqembu elimfunayo.”
USiyanda Xulu naye ofakwe ohlwini kuvela ukuthi ujima yedwa njengoba engafinyeleli esivumelwaneni sokuqanyulwa kwenkontileka yakhe neChiefs.
Izolo kuvele ukuthi Amakhosi ahlola umgadli wase-Argentina uJonathan Philippe oke wayibamba kwezinkunzi zaseArgentina iBoca Junior.
Khonamanjalo iBloemfontein Celtic imemezele ukuthi isisayinise uSipho Jembula obedlala kwiPolokwane City noVictor Letsoalo obekwiBaroka FC.