Ubuyele kwiRichards Bay FC obehlolwa yiPlatinum Stars
UBUYELE kwiRichards Bay FC kwiNational First Division (NFD) egijima uMichael Gumede obehlolwa yiPlatinum Stars edlala kwi-Absa Premiership.
Emasontweni amabili adlule Isolezwe ngeSonto labika ukuthi uGumede ufunwa yiDikwena efuna ukumhlolela eduze.
USifiso “Jomo” Biyela ongusihlalo weRichards Bay FC utshele abezindaba ukuthi uGumede esebuyile eqenjini.
“UMike (okuyisiteketiso sikaGumede) usebuyile. Ngeke esaya ndawo. Umdlali esesimlindile nguBongani Mthethwa esimboleke kwi-Orlando Pirates. Okwamanje usadlala kwiBafana Bafana ematasa nemidlalo yokuhlungela iChan.
UZola Jinxa, Njabulo Ngcobo noSimphiwe Lumkwana bazodlala lapha kwiRichards Bay FC. Bobathathu sibaboleke kuMaZulu. UKhaya Shozi noSiphelele Mkhulise beMamelodi Sundowns bavele sebelapha eqenjini.
“UBiokano Komane uzoba ngukaputeni weqembu,” kusho uBiyela.
U-Avela Cezu oke wayibamba kuMaZulu naye uzicija neRichards Bay FC.
“Iqembu esinalo yiqembu elinethuba lokwenza kahle. Ngaphandle kwabadlali abahambile abanye abebekhona eqenjini ngesizini edlule sibagcinile. SinoXolani Ngcobo, Misho Mtebule, Komane, Sonke Ntuli, Mike Gumede, Philani Cele noSpandiel (Evander).
“Abadlali esibasayinisile asivelanga nje sabasayinisa kodwa besibheka ukuthi yikuphi lapho sishoda khona.
“Njengoba sihanjelwe nguJB (Jabulani Ncobeni) besifuna umdlali ozocishe adlale njengaye. Yingakho-ke silande uSiphesihle Mkhulise.
“UKhotso Malope nonke nimbonile edlala kwiChiefs ngempelasonto ngakho silande uStanley Muishond oqede njengomdlali oshaye amagoli amaningi ngesizini edlule kwiStellenbosch FC,” kusho uBiyela.
IBay FC isesezingxoxweni zokuthola uPaseka Sekese weBidvest Wits.
Kusasa ngo-10 ekuseni iBay izodlala neReal Kings emdlalweni weKZN Premier’s Cup eMhlathuze Sports Complex.