Uzogijima eMphithi obegaqelwe AmaZulu
UVUMBUKE kwiMaritzburg United unozinti waseGhana obefunwa AmaZulu, uRichard Ofori ozovala isikhala esivuleke ngokuhamba kukaVirgil Vries waseNamibia.
ITeam of Choice imemezele ukuthi isayinise u-Ofori (23), obevimbela iWA All Stars, inkontileka yeminyaka emithathu enombandela wokuyivuselela. Emasontweni adlule kuvele ukuthi Usuthu luxoxa no-Ofori emizameni yokuthi azodlala kulona ngesizini ka-2017/2018. Ngaphandle koSuthu kuthiwa neMamelodi Sundowns ibikade imgaqele futhi ubeziqeqesha neCape Town City eqeqeshwa nguBenni McCarthy. U-Ofori ubeseqenjini leBlack Stars elidlale emqhudelwaneni i-Africa Cup of Nations (Afcon) eGabon ekuqaleni konyaka. Uqokwe njengonozinti ovelele eGhana nyakenye emuva kokusiza i-All Stars iwine isicoco seligi.
Ngaphandle kokungayivuseleli inkontileka kaVries, iTeam of Choice, ichithe inqwaba yabadlali okukhona kubona uThemba Tshabalala.
Emasontweni adlule uTshabalala utshele leli phephandaba ukuthi ngesikhathi kuvalwa isizini ubekade esevumelene neMaritzburg ngenkontileka entsha kodwa zashintsha izinto sekufanele kusayinwe. Uthe uncamela ukuyodlala kwiNational First Division (NFD) kunokuhola amakinati emaqenjini e-Absa Premiership.
“Akufanele uphoqe ukuya endaweni noma ubona ukuthi akuhlangani. Abanye bengathi isikhathi siyahamba kodwa kimina akukho lokho. Ngiyazi amaqembu awazwani nokukhokha, agijimela abadlali abasebancane. Ngingamane ngidlale kwiNFD inqobo nje uma ngizothola imali engifanele. Angisakhethi,” kusho uTshabalala.
Abanye abadedelwe yiMaritzburg, uBryce Moon, Happy Mashau noTumelo Mogapi. Inkontileka kaPhilani Zulu ayivuselelwanga, wajoyina iKaizer Chiefs. Leli qembu liphinde lahlukana nokaputeni uKurt Lentjies osejoyine iChippa United. Kungenzeka kugcine ehambile no-Evans Rusike okuthiwa uzobheka kwi-Orlando Pirates