Kuhlongozwa izinguquko e-Afrika nge-Afcon
ISITHANDWA sabalandeli bakanobhutshuzwayo eNingizimu Afrika, uReneilwe “Yeye” Letsholonyane weSuperSport United sizazi kahle izinyembezi zomdlali osuke enenkinga yokukhetha phakathi kokuzidingisa eqenjini lesizwe ukuze agcine indawo eqenjini laphesheya kwezilwandle ne-Afcon.
ULetsholonyane osedlale amaAfcon amabili ubekhuluma kwi-Metro FM ngezinguquko ezisikazwa e-Afrika zokugudluza i-Afcon isuke kuJanuwari iye maphakathi nonyaka. Engqungqutheleni ebiseMorocco kuleli sonto kubhungiwe nangokwandisa amazwe asuke ku-16 aye ku-24.
Lezi ziphakamiso bekulindeleke ukuthi ziphasiswe emhlanganweni wekomoti leCaf elithatha izinqumo izolo eMorocco.
“Ayikho into ebuhlungu njengokubona omunye umdlali ekhala izinyembezi ngoba kufanele akhethe phakathi kweqembu lakhe lesizwe neqembu alidlalela e-Europe.
“Akuyona into efihliwe ukuthi abaqeqeshi base-Europe abayithandi kahle i-Afcon ngoba ibaphuca abadlali babo abamqoka ngesikhathi esinzima lapho isizini isuke isikuvuthondaba.
“Lezi ziphakamiso zingaba wolukhulu usizo ekutheni abadlali bayodlalela amazwe abo ngaphandle kokuba novalo lokuqala phansi balwele indawo yabo uma sekuphele umqhudelwano,” kusho uLetsholonyane.
Ukushayele elikhulu ihlombe nokuphakanyiswa kokwandiswa kwamazwe azobanga izindawo ngoba lokhu kuvula amathuba abengasoze avuleka phambili.
“Imidlalo yokuhlungela imiqhudelwano emikhulu njenge-Afcon amaqembu aseEurope asebenzisa yona ukuthola ithalente elingeke liwambe eqolo.
“Ngokwami ukwandiswa kwamaqembu kuzovula amathuba okuziveza kubadlali bamazwe angakaze acabange ukuthi ayoke abe nethuba lokulwela izindawo emqhudelwaneni omkhulukazi e-Afrika.”