Luphathwa mahhala uhlelo lomngcwabo
NGELEDLULE kuqubuke izinsolo ezingezinhle neze ezibhekiswe kuMzwakhe Mbuli odume ngeleMbongi Yabantu ezithi uqola imindeni yabashonelwe ikakhulukazi abaculi. Osibhincamakhasane bathi ucela emindenini yabashonelwe ukuba bamqashe ekutheni aphathe uhlelo lwenkonzo yomngcwabo. Kuzokhumbuleka ukuthi uMbuli uyena owayephethe uhlelo enkonzweni yomngcwabo kaMandoza, David Masondo weSoul Brothers, Senyaka wodumo wodumo lwengoma ethi Chisampama ehambisana noDJ Walker.
Ezemingcwabo zidlane indlebe noMnuz Xolani Vundla (osesithombeni) waKwaMashu osezakhele udumo ngokuphatha izinkonzo zomngcwabo ngobunyoninco.
Ukhuze abantu ababona ithuba lokuzinothisa uma kuvele esifo emndenini othile.
“Okokuqala nje isifo akuyona into oyihlelelayo yize noma bedlalwa omasingcwabisane. Imvamisa sivele sifike esikhathini esinzima uthole ukuthi kwasendlini akukho ukudla.
“Njengomuntu okholwayo nginakho ukuthi uma uphathisiwe ekutheni uphathe uhlelo lomngcwabo kufana nokuthi uthola isikhathi sokududuza umndeni oshonelwe ngeZwi, ushumayele.
“Owethu umvuzo siyowuthola eKhaya. Asikho isidingo sokuthi uholelwe ngalowo msebenzi,’’ kusho uVundla.
Uthe asikho isidingo sokuthi uma ucelwe ukuthi uphathe uhlelo wumndeni othile nawe uzifake phakathi ethimbeni labahlela umngcwabo. Ngaphandle ke uma kuwukuthi ucelwe yiwona umndeni.
Uthe akukuhle ukuthi ufake abantu bakho ohlwini lwezikhulumi emngcwabeni ngaphandle kokubonisana nomndeni.
“Uma sisekhona isikhathi, ungabafaka abefundisi ngoba basuke bezodlulisa iZwi, akukho ukuphoxa abazokwenza.’’
Emalini esuke iwumnikelo emngcwabeni, uthe akayithathi nangengozi leyo mali.
“Akukuhle ukuthi ugcine usulingeka, usuthatha ngozwane imali yomnikelo, ukuzilethela amabhadi,” kusho uVundla ophiwe nasekushumayeleni.
Asihlangane ekhasini lethu kuFacebook: Isolezwe Ezemingcwabo.