Asihlukane nokufukuzela ezinye izinhlanga
MHLELI: Kuyangidabukisa ukubona abantu abamnyama nokuyibo abangabanikazi bezwe beqiniso begcwele imigwaqo emadolobheni beyiqulu, benza izinhlabaluhide, bephethe izingqwembe beshaya amatoyitoyi bethi akuvikelwe amalungelo abasebenzi ezinkampanini zezinye izinhlanga. Umbuzo wami uthi kuyoze kube nini sifukuzela ezinye izinhlanga?
Asihlukane nokuchitha isikhathi sethu silekelela ekwenzeni imikhiqizo yezinye izinhlanga silokhu siqhosha ngokuthi siqashiwe siyasebenza sibe senza imikhiqizo ethuthukisa ezinye izinhlanga thina sibe singenalutho. Ukusebenza kudaliwe bakwethu futhi ukuze uphile kufanele usebenze. Kepha ngalokho akushiwo ukuthi asisebenzele ezinye izinhlanga singazenzeli okwethu. Asifunde ukuzisungulela eyethu imisebenzi ezolawulwa yithina. Makube yimisebenzi esizoyisungula ngamandla ethu, sisebenzise imali yethu, sisebenzise ubuhlakani bethu, inzuzo eqhamuka lapho kube ngeyethu.
Abafowethu abaningi bezinhlangano zezinyunyana zabasebenzi bathi baqhuba umqondo owaqhamuka noKarl Marx, Trosky, Engels noStalin oyisisekelo sohlelo lobuKhomanisi wokuthi akulwelwe futhi kuvikelwe amalungelo abasebenzi. Kepha abafowethu abakulibalayo wukuthi la madoda akakhulumanga ngalokhu kuphela kodwa ayegxile ekutheni abantu abayingxenye yomkhiqizo noma wahlobo luni kufanele babe nobunini nobunikazi ezikhungweni zomkhiqizo abakuwo bangabi abasebenzi kugcine lapho. Iqiniso limile bantu bakithi lokuthi ezinye izinhlanga sezikhombise kaningi ukuthi azizimisele ukunikeza abantu abamnyama, ngokuvamile okuyibo abangabasebenzi, ubunini nobunikazi ezinkampanini zazo. Manje yiliphi leli themba esinalo lokuthi bayoke basinike ingxenye yobunikazi ezikhungweni zabo?
Asithathe ubuchwepheshe esibuthola ezinkampanini zezinye izinhlanga nemali engumholo wethu siphume siqale okuzoba ngokwethu ngisho noma kukuncane kangakanani. Uma senza kanje siyobe sesingena enkululekweni yeqiniso futhi uMvelinqangi uzosibusisa. Asihlukane nokulekelela ekwenzeni imikhiqizo yezinye izinhlanga bese silokhu sizikhohlisa ngokuthi lokhu kuyizinhlanhla esizinikwa ngabantu bakithi abangasekho. Asihlukane nokulekelela entuthukweni yezinye izinhlanga bese lokho sikubiza ngenhlanhla. Thamsanqa Zama UMLAZA