UBooysen akagxilile eqenjini azolidlalela
UKAPUTENI weBafana Bafana ematasa namalungiselelo omdlalo womlenze wesibili wokuhlungela i-African Nations Championship, uMario Booysen, akanandaba nokuthi uzobe edlalelani ngesizini ezayo kepha akubhekile ukwenzela izwe lakhe umsebenzi njengoba eceliwe.
IBafana izenzele umsebenzi wabalula ngeledlule inqoba kwiBotswana ngo 2-0 eFrancistown ngamagoli ashaywe uRyan Moon noGift Motupa. Sekumele iqedele umsebenzi ekhaya eMoruleng Stadium ngoMgqibelo ngo-3 ntambama.
NgokukaBooysen osemabhukwini eMamelodi Sundowns kodwa obebolekiswe kwiSuperSport United ngesizini edlule, ukuthi uzobe edlala ngaphansi kukaPitso Mosimane noma cha, yinto angenandaba nayo kodwa ufuna ukufaka iBafana kwiCHAN ezoba seKenya ngoJanuwari wonyaka ozayo. U-Eric Tinkler opheka i-United useke wakuveza ukuthi ngeke amdinge uBooysen ngesizini ezayo. “Ngiyibhekile isizini ezayo futhi ngizimisele ngokuqhubeka nokwenza lokhu okwenze ngaze ngaqokwa ukuba ngizohola leli qembu lesizwe. Ukudla iNedbank Cup neSuperSport kuvukuze okuthile kimina manje sengathi sengingawina okuthile njalo. “Ngabe ngikhuluma iphutha uma ngingaqinisekisa ukuthi ngizobe ngidlala kuphi ngesizini ezayo futhi akuyona into esemqondweni wami okwamanje. “Ngiyazi ngisemabhukwini eSundowns futhi noma ngabe isiphi isinqumo abasithatha ngami ngizosamukela,” kusho uBooysen.
UBooysen uthole lesi sikhundla ngoba uLehlohonolo Masalesa obedlala phesheya kwezilwandle okunguyena obehola iqembu kusuka kwiCosafa Castle Cup, uhoxisiwe eqenjini ngenxa yokuthi kwiCHAN akuvumelekile ukuthi izwe lisebenzise umdlali ongenayo inkontileka kanti nemenenja yakhe imcelile kwiBafana ukuze imzamele ikhaya elisha.
Kulona leli qembu lesizwe iSuperSport icele ukuba kukhululwe uTebogo Mokoena. Okumangazayo-ke ukuthi imkhiphelani kwiBafana uMokoena uma isikhala sakhe sizovalwa ngoMichael Morton wawo belu aMatsatsantsa a Pitori.
Ephawula esitatimendeni seSafa, uMorton ngokubizwa kwakhe, uthe: “Ngijike sengifikile eZanzibar lapho bengithi ngiyophumula khona kodwa bengingeke ngizibe ngibizwa yiqembu lesizwe.”