UBaxter akanamfihlo yokudla iPirates
NGESIKHATHI umqeqeshi we-Orlando Pirates, uKjell Jonevret, ekhala ngokuba ngamahlongandlebe kwabadlali bakhe ngokwenzeke kowamanqamu eNedbank Cup, uStuart Baxter uncome abakhe ngokuzimisela nokulandela amaqhinga akhe ukuze banqobe le ndebe.
Iqembu likaBaxter, iSuperSport United, linqobe ngo 4-1 eMoses Mabhida Stadium, eThekwini ngoMgqibelo ebusuku. UBradley Grobler ushaye amagoli amabili, amanye ashaywe wuJeremy Brockie noKingston Nkhatha. ElePirates lishaywe nguOupa Manyisa okube yiphenathi.
UBaxter uncome abadlali be-United ngokunyusa izinga bavala isizini yabo ngegiya eliphezulu.
Lo mqeqeshi osezothatha ngokugcwele ekuqeqesheni iqembu lesizwe iBafana Bafana, uthe ubadonse ngendlebe abadlali bakhe ngokuthi badlalele iqembu bangabheki ekutheni bajabulise yena njengoba esehamba.
“Bengilokhu ngizama ukuthi ngingakugqamisi ukubaluleka kwalo mdlalo kumina ngoba ngenzela abadlali. Ngakho umdlalo ubungekho ngami bekufanele bona baphendule isizini yabo bayenze ibe ngenhle kakhulu. Bekumele benzele iqembu bese beletha injabulo kubalandeli bethu.
“Abadlali benze kahle kakhulu ekulandeleni indlela ebesihlele ukudlala ngayo. Bakwazile ukwehlisa imimoya, baba bukhali ukuze bathathe indebe bagoduke nayo,” kusho uBaxter.
Lo mqeqeshi bese kungokwesibili eshaya iPirates kowamanqamu njengoba enzile ngesizini edlule kuyona iNedbank Cup. Kule sizini ubeseyiphinda okwesibili ngehlazo, koweligi emzuliswaneni wokuqala iBucs yabhudluzwa ngo 6-1.
“Ayikho imfihlo. Ngicabanga ukuthi wonke umdlalo uhlukile. Namhlanje (ngoMgqibelo) besiwuphethe kunalona ka 6-1. IPirates iyazigqaja ngesitayela sayo sokudlala. Lona bekuwumdlalo wamanqamu bekumele beze kithina. Bebengeke bahlale emuva ngoba nakhu sihamba phambili ngo 2-0. Besinendlela esihlele ngayo futhi nomdlalo wahamba njengokufisa kwethu,” kusho
uBaxter. I-United iqede endaweni yesihlanu kuligi. UBaxter uthe wethemba ukuthi abadlali bazoqhubeka nentshisekelo yokusebenza kanzima ukuze bawine ezinye izicoco. Ngesizini ezayo Amatsatsantsa azophekwa wu-Eric Tinkler onqobe iTelkom Knockout neCape Town City ngesizini edlule.
“Ngicabanga ukuthi kukhona konke esikwenzile basangalinyusa izinga. Empilweni awumi ndawonye, kuphakathi kokuthi uyakhula noma uyabheda kunalokhu obuyikho. Ngizohambisa umbiko wami eqenjini. Ngikholwa wukuthi basazolinyusa izinga. Umdlali ofana noGrobler usebuyela efomini kukhona noCole (Alexander) ababuya ekulimaleni abazoshubisa umbango,” kusho uBaxter.