UKomanisi uthungatha amadlelo aluhlaza engasizwa wuphromotha
OBENGUMPETHA we-International Boxing Organisation (IBO) featherweight, uLusanda “Mexican” Komanisi, usethathe isinqumo sokuthungatha amadlelo aluhlaza phesheya kwezilwandle ngaphandle kosizo lukaphromotha.
UKomanisi, obesesitebeleni sikaTeris Ntuthu, iRumble Africa Promotions, useqede unyaka enganaye uphromotha oqondile. Unqume ukungayivuseleli inkontileka noNtuthu ngenxa yokuhluleka kwakhe ukumhlelela izimpi. Ngasekupheleni konyaka odlule, uKomanisi, usayine inkontilela neGreg Cohen Promotions yaphesheya kwezilwandle. Nokho zigcine zihlukene izindlela emuva kokuthi nayo le nkampani ihlulekile ukumhlelela izimpi nokuphethe ngokuthi aphucwe ibhande le-IBO ngenxa yokungalivikeli.
UKomanisi uzobhekana noTello Dithebe empini yemizuliswano engu-10 ezoba ngeSonto eGauteng. Ihlelwe ngu-Anton Gilmore.
“Ngizozizamela indlela yokuya phesheya kwezilwandle ngaphandle kosizo lukaphromotha. Anginazo izinhlelo ezitheni ngemuva kwale mpi kodwa uma ngiwina ngizonyukela endaweni ka-10 ku-Boxrec. Lokho kuzongivulela amathuba,” kusho uKomanisi.
“Ngahlukana noNtuthu ngoba ngibona ukuthi ugxile ku-Azinga Fuzile. Asixabananga kodwa nganquma ukungayivuseleli inkontileka naye ngoba ngibona ukuthi akagxilile kimina.”
UKomanisi ugcine ukungena eringini ngo-Okthoba 2015 evikela ngempumelelo ibhande le-IBO kuRoli Gasca wasePhilippines empini eyayise-East London. Ungomunye wabashayisibhakela ababekade bengaphansi kwesitebele sikaNick “Mthakathi” Durandt (ongasekho) abathwele kanzima ukuqhubekela phambili kusukela bejoyine abanye abaqeqeshi. Nakuba bezitholele amanye amakhaya esaphila uDurandt kodwa kodwa abanye babo izinto azibavumi emajimini amasha.
“Sengiyakuqonda manje ukuthi esibhakeleni kuyenzeka izimpi ungazitholi, uhlale isikhathi eside. Kufanele ngiqine,” kusho uKomanisi.
Ezimpini ezingu-23 usahlulwe kathathu. Ugcine ukuhlulwa ngo-2013 ekhala ngaphansi kuCebo Ngema waKwaZulu-Natal nokwenzeka ngaphambi kokuthi awine ibhande le-SA featherweight. Kusukela eqale ukuphatha amabhande akakaze aphinde ahlulwe.