Iziguli ziyacanasa kuteleke onogada
ZIZICANASELA ezitolo zasedolobheni ngamaphijama iziguli zasesibhedlela saseManguzi ngenxa yesiteleka samaholo sonogada.
Lokhu kuthiwa kulokhu kuqale phakathi kwale nyanga ngesikhathi onogada abaqashwe yinkampani ezimele esebenza esibhedlela belaxaza umsebenzi ngoba bekhala ngokungaholelwa ngesikhathi.
Onogada kuthiwa bayafika esibhedlela begqoke izingubo zabo bengawugqokile umfaniswano ukuzobheka amagundwane.
Umsebenzi wasesibhedlela ongagunyaziwe ukukhuluma nezintatheli uthe lokhu sekuholele ekutheni abantu neziguli bazicanasele nje esibhedlela bengagadwe muntu.
Uthe nabo bengabasebenzi bakhathazekile ngokuphepha kwabo ngoba ngisho namalungu omphakathi asefika noma yingasikhathi sini – angena ephuma esibhedlela.
“Okubuhlungu wukuthi abasebenzi bahlale bethwala izinkinga zesiteleka. Akuqali ukuthi kume ukusebenza konogada ngenxa yenkinga yamaholo nesimo sokusebenza. Abasebenzi sebeteleke kathathu selokhu kuqale unyaka bekhala ngento efanayo. Njalo uma betelekile kuba nezigigaba ezihlukumeza abasebenzi. Kokunye kuntshontshwe amasondo ezimoto ezipake esibhedlela. Njengoba kuqale lesi, kuntshontshwe iselula yomunye wodokotela. Asizizwa sikhathalelwe abaphathi besibhedlela ngoba bayayiyekela le nto ilokhu iqhubeka.”
Okhulumela uMnyango wezeMpilo KwaZulu-Natal, uMnuz Sam Mkhwanazi, uthe ngenxa yesiteleka sonogada athe siqale ngoJune 19 sekukhona izinhlelo esezifakiwe ukuqinisekisa ukuthi iziguli nabasebenzi baphephile.
Ilungu lomphakathi elinesihlobo esilaliswe esibhedlela lithe lifike esibhedlela lashaqeka ngesikhathi lihlangana neziguli ezitolo ezingaphandle kwesibhedlela. Ezinye zeziguli zilaliswe ngoba zilashelwa ufuba olungayizwa imishanguzo, imultidrug-resistant tuberculosis.
Lezi ziguli nezinye zibonakala nsukuzonke ziya ezitolo noma zizihlalele ngaphandle kwesibhedlela zigqoke amaphijama.
Uthe lesi simo simkhathazile ngoba kusho ukuthi iziguli azivikelekile. Nemindeni yalabo abalaliselwe izifo ezithelelanayo njengofuba olungayizwa imishanguzo ayiphephile.