Abayizwa kahle eyamaphini amabili
I-ANC KwaZulu-Natal ishaya amakhala mayelana nesiphakamiso sokuthi kube namaphini amabili kamengameli.
USihlalo we-ANC esifundazweni uMnuz Sihle Zikalala uthe abayizwa kahle eyamaphini amabili ngoba ababoni ukuthi umsebenzi welesibili kuzoba yini.
“Maqabane akumele sikhande izikhundla ngoba sifuna ukubhekelelana. Ngikhumbula kudala kwenziwa isiphakamiso sokuthi kube namaphini amabili kasihlalo we-ANC, ngaleso sikhathi kwakusekhona uMnuz Harry Gwala owaphumela obala wathi akakaze ayizwe leyo nto,” kusho uZikalala.
Uthe uma kuthiwa iphini lesibili likamengameli lizobhekela izindaba zangaphandle ukhona umnyango owenza lokho.
“Kunengxoxo mayelana nokuthi sibe namaphini amabili kanobhala-jikelele, omunye uzogxila ekuqapheni, ukuhlunga nokucwaninga, omunye agxile ekwakheni iqembu, ahole nemikhankaso,” kusho uZikalala.
Isiphakamiso samaphini amabili kanobhala-jikelele sivele ngemuva kokuthi kube nesiphakamiso sokuthi senyuswe isibalo sesigungu esiphezulu se-ANC samalungu ayisithupha abe yisikhombisa. Sivele nasengqungqutheleni yemigomo eGauteng lapho uSihlalo wesifundazwe uMnuz Paul Mashatile eqinisekise ukuthi kunesiphakamiso sephini lesibili likamengameli namaphini amabili onobhala. Uthe lokhu kuzoqinisa ihhovisi elikhulu le-ANC.
Ngesikhathi i-ANCYL iphakamisa amagama efisa bakhethwe engqungqutheleni kaDisemba iveze amagama amaphini kanobhala-jikelele, iphini lokuqala uNkk Jessie Duarte, elesibili uMnuz Fikile Mbalula.
Izolo amalungu e-ANC e-Eastern Cape abenengqungquthela yawo yesifundazwe. UNksz Fikile Xasa oyilungu lesigungu esiphezulu se-ANC uthe abenza sengathi konke kuhle kuleli qembu bayizitha zalo ezinkulu. Kule ngqungquthela ebise-East London kuvele umbono wokuthi kumele ivuselelwe kabusha i-ANC.
UNksz Xasa ophinde abe nguNgqongqoshe wezokuBusa ngokuBambisana neziNdaba zoMdabu e-Eastern Cape ugxeke umndeni wakwaGupta ngokungenelela ekulawulweni kwezwe.
“Abantu bavotela i-ANC hhayi umndeni wakwaGupta. Ngeke siyeke ukukhuluma ngokugxambukela kwalo mndeni yize abanye bengathandi sikhulume ngakho. Umndeni wakwaGupta umataniswa nenkohlakalo futhi siyazi ukuthi i-ANC ilahlekelwa ukwesekwa ngenxa yalokhu,” kuchaza yena.
Uthe uma kungakhulunywa ngezinkinga ezibhekene ne-ANC iqembu lizolimala wathi abanye abasayeseki i-ANC ngenxa yokwenziwa ngabaholi bayo.
“Baningi abangeneme ngabaholi be-ANC ngoba sinabaholi abangenandaba abazithwele. Sinenkinga yabaholi ababeka phambili izidingo zabo nezabangani kunezabantu,” kusho uNksz Xasa.
Ugcizelele nokuthi azilalelwe izingqalabutho ezindala ze-ANC wagxeka abaholi abangayihloniphi imibono yazo. Ngesikhathi sokushicilela izolo bezingakaveli izinqumo ezithathwe kwezinye izifundazwe ngemigomo yeqembu.