USam uncoma ukunyusa izinga kubagijimi bakuleli
UMENGAMELI weSascoc, uGideon Sam, ukushayela ihlombe ukunyusa izinga kwabagijimi bakuleli abalokhu beqhubeke njalo ngokuvelela uma bencintisana nezimbangi ezingeni lomhlaba.
USam uthe ukuvelela kukaWayde van Niekerk, Akani Simbine, Luvo Manyonga noCaster Semenya, selokhu kuqale isizini yezokusubatha lapho beyibamba emiqhudelwaneni emazweni ehlukene, kunikeza ithemba ngokuthi bazokwenza kahle kwiIAAF World Championship.
Imidlalo yamaWorld Champ iseLondon ngo-Agasti. UVan Niekerk uzoyibamba kwi-200m nakwi-400m kule midlalo. Uqhubekile nokushaya into ecokeme ngesikhathi edla umhlanganiso e-EA Classic, eVelenje eSlovenia ngoLwesibili ebusuku.
UVan Niekerk akagcinanga ngokuphuma phambili kodwa ushaye isikhathi esihle kunazo zonke aseke azigijima ku-100m eqopha u-9:94.
Lesi sikhathi sehlile kunalesi abenaso kuleli banga u-9:98. Ulandelwe u-Emile Erasmus noHenricho Bruintjies bonke bakuleli.
“Umgijimi ofana noWayde ulokhu eqhubeke njalo nokubamba umgqigqo. Lena iyona into okumele abagijimi bayiqonde ukuthi kumele ukwazi ukubamba isigqi. Ungafike wenze kahle bese uyehla futhi ngokushesha. Lokhu (okwenziwa uWayde) yikhona okukhombisa ukuthi ungumgijimi osezingeni lomhlaba futhi uhamba phambili.
“Ngicabanga ukuthi kulo nyaka kumele silindele ukubona abagijimi abaningi abazokwenza kahle kumaWorld Champs. Sibonile uLuvo ulokhu eqhubekile nokugxuma kahle. Nabanye abebehlelwe yifomu njengoRushwal Samaai noCornel Fredericks sebeyalinyusa izinga,” kusho uSam.
UVan Niekerk ephawula engxoxweni abe nayo base-IAAF, uthe: “Ngijabule kakhulu. Lesi yisikhathi sami esihle futhi ngiyajabula ukuthi umjaho uhambe ngendlela ebengifisa ngayo. Lokhu kuzongisiza emabangeni ami engiwabhekile u-200m no-400m.”