UCoetzee enkingeni yokuthatha isinqumo
UBHEKENE nenkinga umqeqeshi wamaBhokobhoko, u-Allister Coetzee, okumele akhethe phakathi kokuqhubeka nesikimu anqobe ngaso emibili yokuqala yeCastle Lager Incoming Tour neFrance, noma anike ithuba abadlali abengakababoni kodwa lokhu kungase kunyomfe izinto.
Kuzokuthi ngoMgqibelo ezikaCoetzee ziphinde zibhekane neFrance kowokugcina wale midlalo ewuchungechunge ngo-5 ntambama, e-Emirates Airlines Stadium, eGoli. Kowokuqala AmaBhokobhoko anqobe ngo 35-14 eLoftus Versveld, ePitoli. Lowo mphumela ulandelwe owangempelasonto edlule eThekwini lapho ezikaCoetzee zinqobe khona ngo 35-15, eGrowthpoint Kings Park Stadium.
Njengoba imidlalo emithathu ewuchungechunge isivele isinqotshiwe kwazise u 2-0, uCoetzee umelwe ukwenza izinqumo eziningi ngesikimu azosibophela kulo mdlalo. Okokuqala ukuthi ayikho into engehla kamnandi kuCoetzee njengokunqoba ngo 3-0 kwiFrance ngemuva kwemidlalo emithathu. Lokhu kuzomkhulula ekutheni aqhubeke kahle kule sizini kwazise edlule ibichichima ukuphoxeka. Uma nokho lo mdlalo uwubheka ngelinye iso, unika lo mqeqeshi ingqayizivele yethuba lokubophela abadlali abengakalitholi ithuba lokubabona besemdlalweni. Nakuba kunjalo kodwa vele lo mqeqeshi useqalile uphethwe yikhanda kwazise u-Oupa Mohoje ngeke esadlala ngenxa yokulimala kanti uJean-Luc du Preez ushaye into ecokeme eThekwini. Omunye umdlali ongeke adlale uRoss Cronje kodwa kubuya noJesse Kriel obelimele kowaseThekwini nowayeqokwe njengovelele emdlalweni wokuqala ePitoli.
“Ngokwami ngiye ngingathandi ukushintsha isikimu esiwinayo. Nakuba kunjalo, ngiyalibona ithuba lokukhululisa isikimu sami. Kumnandi ukwazi ukuthi uma engadlali usibanibani nakanjani uzongenzela umsebenzi oncomekayo usibanibani. Kungenzeka kube nezinguquko kodwa uma sizenza sizobe sikwazi konke esikufunayo nesikuhlelele iqembu. Akuwona umdlalo esiwuthatha kalula ngoba sithi sesinqobile. Kithina lesi esinye isivivinyo esifanayo nazo zonke ezinye esisazohlangabezana nazo kule sizini,” kusho uCoetzee.
Kulindeleke namuhla ntambama, uCoetzee amemezele isikimu azodudulana ngaso neFrance ngoMgqibelo. ULionel Mapoe noFrancois Venter bayiswe kwiSouth Africa A odlala neFrench Barbarians kusasa ebusuku e-Orlando Stadium, eSoweto.