Weluleke intsha onenkampani iGlobal Direct
UGQUGQUZELE intsha ukuthi isukume ifune amathuba omsebenzi nawebhizinisi uMnuz Sydwell Khoza (34) onenkampani esiza abantu ngemikhiqizo yomshwalense we-The Unlimited.
Inkampani kaKhoza, ebizwa ngeGlobal Direct, inabasebenzi abangu-530 emahhovisi angu-11 ezifundazweni ezehlukene eNingizimu Afrika.
UKhoza utshele Isolezwe ukuthi wabona isikhangiso se-The Unlimited ephephandabeni emuva kokuphothula u-matric ngo-2001.
“Ngizalelwe eLaratong Hospital eGoli, ngakhulela ePiet Retief, eMpumalanga kwathi sengiqala amabanga aphezulu umama wangilanda ngayohlala e-Orange Farm, enyakatho yeGoli. Ngihlale izinyanga eziyisithupha ngase ngiyohlala nobaba eMofolo, eSoweto. Ubaba ubengumakhi ngakho nami bengibamba itoho kuye ngingubricklayer. Emuva kokuphothula u-matric abazali bebengenayo imali yokuthi ngiqhubeke nezifundo zami ngase ngifuna umsebenzi,” kusho uKhoza.
Uthe wabona isikhangiso se-The Unlimited ephephandabeni wagibela itekisi esuka eGoli weza eThekwini ezofuna umsebenzi kule nkampani.
“Ngifike ngino-matric kuphela kwi-The Unlimited bangiqeqesha ukuze ngidayise umshwalense. Ngenxa yokuzimisela kwami ngakhuphukela ezigabeni ezihlukahlukene ngagcina sengiphethe abanye abasebenzi kwase kuvela ithuba lokuthi singakwazi ukudayisa imikhiqizo ye-The Unlimited njengosomabhizinisi (franchising) ngase ngivula inkampani yami ngo-2007. Abe-The Unlimited bayaqhubeka nokungixhasa njengoba ngibhekwa ukuthi ibhizinisi lami liyaphumelela yini,” kusho uKhoza.
Phakathi kwezingqinamba abhekene nazo ubalule ukuthi ubengazithembi ngoba ubesebenza nabantu abanama-diploma nama-degree.
“Ngithanda ukutshela intsha ukuthi kumele izethembe ingazenyezi ngoba ukungayi enyuvesi akusho ukuthi iphelile impilo yakho. Uyakwazi ukuphumelela noma uno-matric inqobo nje uma uzimisele kokwenzayo. Uma ubona sengathi iminyango ivalekile kufanele ubekezele uqhubeke nokufuna umsebenzi namathuba ebhizinisi ngoba ekugcineni uzophumelela,” kusho uKhoza. Uthe ushadelwe unezingane ezine. UNksz Sne Makhanya oyiNhloko yezokuXhumana kwi-The Unlimited uthe bafuna ukuthuthukisa abantu ngokubavulela amathuba ebhizinisi nawomsebenzi ikakhulukazi kulesi sikhathi somnotho ontengayo eNingizimu Afrika.
Uthe baqashe abantu abangu-54 000 kanti bayayisiza imiphakathi eyakhelene nabo ngokutshala imali ezinkulisa nakwezinye izinhlelo zomphakathi.