Iseyinkinga eyenkambu yabokufika
ININGIZIMU Afrika ayikakabi sesimeni sokugcina ababhacile ezinkanjini, yingakho abokufika behlala noma yikuphi lapho bethanda khona.
Lokhu kuvezwe wuNkk Fatima Chohan, oyiPhini likaNgqongqoshe wezaseKhaya kuleli othe uma uzogcina ababhacile enkanjini kudinga ube nemali nezinsiza ezenele ezifana nokudla, ezemfundo, ezempilo nezinye kanti elakuleli alikabi sesigabeni sokukwenza lokho. Uthe izinhlangano zosizo azikwazi ukwenelisa ababhacile ngakho konke abakudingayo, yingakho iNingizimu Afrika yanquma ukuthi ababhace kuleli babe nelungelo lokusebenza noma bazivulele amabhizinisi.
“Iningi labantu ababhace kuleli ngabantu abasha banezidingo eziningi. Ngesikhathi izwe lethu lithatha isinqumo sokwamukela ababalekela izimpi emazweni abo, abaholi babona ukuthi nathi sisadonsa kanzima ngeke sikwazi ukwenelisa bonke abantu abahlala ezinkanjini ngezinsiza. Uma besebenza, bakhokha irenti bazenzele zonke izidingo zabo.”
Uthe ababhacile banelungelo elifanayo nelezakhamizi zakuleli, okungaba ukuthola izindlu zomxhaso, ukufundisa izingane ezikoleni okungakhokhwa kuzo. Ilungelo abangenalo uthe elokuvota.
Uqhube wathi e-Afrika yiNingizimu Afrika kuphela enamalungelo anjengalawa. Uthe kungezeka futhi ukuthi yiyona kuphela emhlabeni.
UDkt Egide Ndiyishimiye obemele ababhace kuleli baseCongo, eRuwanda namanye amazwe uthe bakujabulela kakhulu abakwenzelwa yiNingizimu Afrika kodwa bangathokoza uma kungase kuqalwe izinhlelo zokuhlanganisa abokufika nabantu bakuleli.
“ENingizimu Afrika asizele ukuzontshontsha imisebenzi yabantu, emazweni ethu sibalekele izimpi. Ngesikhathi silapha siqala amabhizinisi athuthukisa umnotho. Abanye bethu badlulisela amakhono kubantu bakuleli abasebenza nabo uma bakha izindlu, bakha ama-buglar guards nokunye.”
U-Advocate Ashantewee Ngidi uthe okunye okungehlisa ukuxwaywa kwabantu bokufika ukuthi ababhacile bafunde izilimi zabantu abahlala nabo njengesiZulu.
“Lokhu ngeke kwenzeke uma abantu bakuleli bengabathembi abantu bokufika. Ulimu ulufunda ngokuhlangana nabantu abalukhulumayo.”