Usolwa ngobudedengu unina wentombazane eyadlwengulwa
AMALUNGU omphakathi waseLindelani asola ubudedengu kunina wentombazane okuthiwa idlwengulwe uyise ongayizali ngoMsombuluko.
Umthombo okhulume neSolezwe uthe isimo sike saba manzonzo phakathi kwamanye amalungu omphakathi nonina wentombazane eneminyaka engu-12 okuthiwa idlwengulwe yisoka lakhe elineminyaka engu-40.
Uthe omakhelwane baqale ukumsola ngobudedengu ngesikhathi evumela isoka ukuthi lihambe nentombazane ubusuku bonke laze layibuyisa ekuseni ngakusasa okusolakala ukuthi kube yisiqalo sokudlwengulwa kwayo nokuthiwa kwenzeke ngenyanga edlule.
“Ngesikhathi simsola ngalesi senzo usitshele ukuthi yingane eyakhalela ukuhamba noyise imvakashele endlini yakhe. Waba budedengu ngokwethemba le ndoda ngokweqile. Uhlule noma sesimbonisa ukuthi kukhona okungahambi kahle enganeni ngoba sibona ukuthi ayiswabulukile kodwa yena wakhombisa ukungasinaki,” kusho umthombo.
Uthe okuhle wukuthi unina wengane useyalibona iphutha lakhe futhi usezehlisile ngemuva kwalesi sehlakalo.
Ikhansela lakule ndawo, uNkk Nokufika Biyela, lithe bahlela ukuyobhikisha ngaphandle kweNkantolo yeMantshi yaseNtuzuma ngenhloso yokufaka ingcindezi yokuthi umsolwa anqatshelwe ibheyili.
“Sifisa ukuthi inkantolo ingamniki ibheyili. Sisazoxhumana nomphenyi wecala ukuze sithole usuku umsolwa azovela ngalo eseyocela ibheyili ngoba besingakazi lutho ngokuthi uzovela nini enkantolo. Isenzo esinjengalesi siyasigxeka kakhulu emphakathini wethu ngeke sivumele ukuthi izingane ziphenduke imigilwa yokuhlukunyezwa,” kusho uNkk Biyela.
Unina wentombazane ukuqinisekisile ukuthi isiphumile esibhedlela wathi ukuhlolwa kwayo kuveze ukuthi idlwenguliwe.