Belihlelela umshado iphoyisa elibulewe
IQULEKE kabili ingoduso yephoyisa ebizoshada nalo ngoDisemba, ibikelwa ngokushona kwalo lidubulana nezigebengu eHammarsdake entathakusa ngoMsombuluko.
Lokhu kuvezwe nguNksz Philisiwe Zwane ongudadewabo kaWarrant Officer Ndabenhle Zwane (44), osale enkundleni kwashona nabasolwa abayisishiyagalombili. UZwane obesebenzela uphiko lweNIU, ubehamba nozakwabo bedubulana nabasolwa okuthiwa bebeyoqhumisa ama-ATM enxanxatheleni yezitolo kwaWebber. Udadewabo oseMpophomeni eHowick lapho kukhulele khona umufi, uthe isimo simuncu kubo.
“Besilinde umshado kaNdabendle ngoDisemba ngoba ubeseqalile nokuthenga izimpahla ebekelela. Ingoduso yakhe ivele yaquleka izwa ukuthi ushonile. Kubizwe i-ambulensi yaphuza ukufika, yagcina iphapheme sayiyisa kwadokotela. Iphinde yaquleka yaze yaphaphama kodwa namanje kusenzima kuyona,” kusho uNksz Zwane.
Uthe umfowabo ubezinikele emsebenzini ngoba wayevele ekuthanda ukuba yiphoyisa. Uthe waqala ukusebenza ngo-1998.
“Ubedela konke uma esebizwe emsebenzini. Ubeya ngisho eCape Town nasePitoli ngawo umsebenzi. Besize simbhuqe sithi ngathi uyena yedwa oyiphoyisa indlela awuthanda ngayo umsebenzi.”
UNksz Zwane uthe umufi ubenomuzi eWyebank eThekwini ehlala nengoduso nengane. Uthe bebengamsweli kubo eMpophomeni njengoba egcine ukufika ngoMgqibelo. Uthe yize umsebenzi ubumenza angabi naso isikhathi, ubengakhohlwa ukuhlola umndeni.
“Ubethanda wonke umuntu nemfuyo ayishiyelwa ubaba ibibhekwa uyena. NgoMgqibelo wafika waqoqa izingane zakhe nezami wathi azikhethe ezikufunayo. Wathembisa indodakazi yami ukuthi uzoyifakela iDStv ebikade ikhala ngayo. Besazi ukuthi kuzoba mnandi uma efike ekhaya,” kuchaza uNksz Zwane.
Umufi obenezingane ezintathu okungezona ezengoduso, uzongcwatshwa kubo ngoMgqibelo.
Izolo uNgqongqoshe wezokuThutha nokuPhepha koMphakathi KwaZulu-Natal, uMnuz Mxolisi Kaunda, uvakashele umndeni wephoyisa eyoduduza. Uthe amaphoyisa akumele ananaze uma esengozini kodwa kumele aziphindiselele.
“Niqeqeshiwe kumele nisebenzise amakhono enu ukuzivikela nabanye abantu uma nisengozini.”
UKaunda uveze ukuthi asemahlanu amaphoyisa asebulewe KwaZulu-Natal selokhu kuqale unyaka.