NATIONAL CERTIFICATE VOCATIONAL L2 – L4
ABAHLENGIKAZI bakhala ngokungahlelelwa ngendlela kohlelo lokuqaliswa kwabantu imishanguzo yokuthithibalisa igciwane lengculazi ama- Antiretroviral ( ARV) uma beqeda ukuhlolwa.
Inyunyana yabahlengikazi iDemocratic Nursing Organisation of South Africa ( Denosa) ithe abahlengikazi sebeqalile ukukhala ngezinkinga asebehlangabezana nazo ngenxa yokulethwa kohlelo olwaziwa ngeUniversal Test and Treat ( UTT).
Lolu hlelo lubhekela ukunika abantu abatholakala benegciwane lengculazi ama- ARV uma beqeda ukuhlolelwa leli gciwane ngaphandle kokubheka izinga legciwane egazini.
Lokhu kulandela ukukhishwa kwemigomo emisha yophiko lwezempilo lwenhlangano yezizwe i- UN, iWorld Health Organisation ( WHO).
UMnuz Mandla Shabangu, ongumgqugquzeli weDenosa KwaZulu- Natal, uthe abahlengikazi basemtholampilo waKwaMashu, iPolly Clinic nabasebenza emtholampilo waKwaNdengezi sebeqalile ukuhlangabezana nezinkinga emva kokulethwa kwalolu hlelo ngomhla ka- 1 Septhemba.
“Abahlengikazi basibikele ukuthi abantu bafika emtholampilo bezohlola balindele ukuthi banikwe imishanguzo ngalo lolo suku.
“Abantu abachazelekile kahle ngohlelo olulandelwa uma abantu bezofakwa kumishanguzo – ngeke bethi behlolwa bebe benikwa imishanguzo. UMnyango wezeMpilo uhlulekile ukucacisela abantu ngalokhu. Manje abahlengikazi sebezithola bethwele kanzima. Kubi kakhulu ngoba kwabona abahlengikazi abakaze bachazelwe ukuthi yiluphi uhlelo okufanele lulandelwe uma abantu beqaliswa kumishanguzo kulolu hlelo,” kusho uShabangu.
Uthe lesi simo sizoholela ekutheni abahlengikazi bahlukunyezwe yiziguli nezihlobo zazo njengoba bekuvele kwenzeka ngenxa yokushoda kwabasebenzi. Ngokusho kwakhe, abantu bafike batshelwe okunye nguNgqongqoshe wezeMpilo kulesi sifundazwe uDkt Sibongiseni Dhlomo kodwa kuthi uma befika emitholampilo bafice okuhlukile. Abachazelwa nokuthi lo mnyango uthathe isinqumo sokungabaqashi abahlengikazi. Kunabahlengikazi abasulayo emsebenzini nabashiya ngenxa yokukhula kodwa kungaqashwa muntu ezikhaleni zabo.
UShabangu uthe inkinga ababhekene nayo wukuthi abahlengikazi okufanele babhekane nalolu hlelo abazange bengezwe.
Ngokusho kwakhe abahlengikazi abebelokhu bekhona yibona okulindeleke ukuthi baqhubeke nalolu hlelo yize beyidlanzana.
“UMnyango wezeMpilo uletha izinhlelo ezintsha futhi ufuna abahlengikazi bakhiphe usizo olusezingeni eliphezulu kodwa uyehluleka ukwengeza isibalo sabasebenzi.
“Awuzange uhlele ngendlela ngaphambi kokululetha. Lokhu kubeka ingcindezi kubasebenzi abakulezi zikhungo nokuyibona abagcina sebesolwa yiziguli,” kusho uShabangu.
Kulethwa lolu hlelo nje uMnyango wezeMpilo usanda kuqeda ngabasebenzi abebeluleka abantu babahlole negciwane lengculazi.
Ngesikhathi lulethwa lolu hlelo ekuqaleni kwenyanga uDhlomo wathi lesi sifundazwe sikulungele ukululetha njengoba sihamba phambili ezibalweni zabantu abasebenzisa imishanguzo.