Sizoziphindiselela kwiBay FC
IKHALAPHI:
NGESONTO sizobhekana neRichards Bay FC esikweleta amaphuzu amathathu. Nginxusa bonke abantu ukuba badlubhe imifaniswano yoSuthu balibangise eMlazi lapho zizobe zibulalana khona.
Kwaba buhlungu emzuliswaneni wokuqala beshaya igoli umdlalo usuyophela, kanti nangale kwalokho, akekho ofuna ukudliwa kowomkhaya.
Yebo bangomakoti kwiDStv Premiership kodwa bayiqembu eliqinile, okunzima ukudlala nalo.
Amankentshane anejoka lokuluma konke abhekana nakho, ikakhulu amakilabhu akulesi sifundazwe.
Okuhle wukuthi inkundla iKing Zwelithini siyayazi, iyikhaya lethu lesibili. Ngeke sisadliwa womakhelwane.
KANGIBASOLI ABALANDELI NGOKUZIZWA BEPHOXEKILE
Ngeledlule siphunyukwe yithuba lokubalwa namakilabhu amane aphezulu kwi-log, kasaze sadlala ngendlela esidlale ngayo sixebula iKaizer Chiefs emasontweni amabili edlule.
Likhulu kakhulu igebe phakathi kwethu neMarumo Gallants.
Siyikilabhu enkulu, ngakho-ke ngeke sibasole abalandeli bethu ngokuzizwa bephoxekile ngokuthi sithole iphuzu elilodwa sidlala nayo ngeledlule.
Kodwa yinto okumele uyilindele leyo uma udlala nekilabhu esemsileni kwi-log.
Kangingabazi ukuthi umqeqeshi wenze konke okusemandleni ukubagqugquzela abadlali isonto lonke ukuba bangawuthathi kancane lo mdlalo.
Ngiyazi nokuthi wonke umuntu osekilabhini uyazi ukuthi kuyigugu kangakanani ukumela igama lekilabhu.
KUFANELE SIHLALE NGOKUZIHLOLISISA, KUBALWA NABALANDELI
Kufanele sihlale ngokuzihlolisisa. Yikho kanye lokho okusisizile sidlala neChiefs.
Ngicela lokhu kuzihlolisisa kwedlulele nakubalandeli bethu nakubona bonke abathanda le kilabhu enomlando ebholeni lakuleli.
AmaZulu FC yikilabhu endala kunawo wonke agijima esigabeni esikhulu, kufanele ngabe kugcwala izinkumbi zabalandeli uma idlala enkundleni yayo iMoses Mabhida Stadium.
Le nkundla isenkabeni yeTheku, okwenza kube lula kubantu uma beza kuyona noma sebephindela emuva, ngakho-ke kakukho ukubeka izaba.
Yingaleso sizathu senza iMabhida yaba yikhaya lethu futhi siyabonga kulabo abaphuma ngobuningi uma sinemidlalo khona.
Lokhu kusho lukhulu kithina.
ENGAZIBOPHEZELA KUKHO KUSABHOKE KAKHULU UKHUVETHE
Ngesikhathi kubheduka iCovid-19, ngazibophezela ngokuyihambela yonke imidlalo yekilabhu ukuze ngifake lowo mfutho womdlali weshuminambili kwazise abalandeli babengavunyelwe ukuya ezinkundleni.
Abaningi babo babesithumelela izilokotho ezinhle ezinkundleni zokuxhumana, besho nokusho ukuthi kabasakwazi ukulinda ukuzozibonela abadlali bethu bedlala ngokuzinikela isonto nesonto.
NGIPHONSA INSELELO KUBO BONKE ABABHEKENE NOKUGCWALISA INKUNDLA
AmaZulu FC yikilabhu yawo wonke umuntu, omncane nomdala, owesilisa nowesifazane.
Ngiyagqugquzeleka kakhulu uma ngibona imindeni nabantu bezinhlanga ezehlukene ezihlweleni, beseka Usuthu.
Ngiphonsa inselelo kumathimba ethu ezokumaketha nezokuxhumana, nakubona bonke esisebenzisana nabo, ukuba bafinyelele kwizinkumbi zabantu futhi bathole indlela yokubasondeza kule kilabhu.
Abantu bezizwe ezixubile baKwaZulu-Natal naseThekwini bahamba noSuthu kanti abanye balulandela ngenxa yabantu basemazweni abo abagijima kule kilabhu ngengoRally Bwalya (Zambia), uGabadhino Mhango (Malawi), u-Augustine Kwem (Nigeria), uJunior Dion (Cote díIvoire) nabanye.
UDion ufike ekuqaleni konyaka kodwa ugila izimanga phambi kwamapali.
NGIZISHAYELA IHLOMBE EZETHU EZIYIBAMBE KWIDISKI CHALLENGE
Ngithanda nokushayela ihlombe umsebenzi omuhle waMankentshane agijima kwiDiski Challenge, nabo bonke abanesandla kuwona.
Ahleli endaweni yesine kwi-log, asele ngamaphuzu ayisishiyagalolunye ekilabhini ezihola phambili.
DUDU EMNDENINI KANONDWEBA ODLULE ENGOZINI YEMOTO
Mangiphethe ngokuthumela amazwi enduduzo emndenini, kubangani nakozakwabo bakaMoeketsi Molelekoa, obengunondweba weSafa, odlule emhlabeni ngengozi yemoto ngempelasonto edlule.
Ngithi dudu, sinani emikhulekweni!
* USandile Zungu ungumengameli wamaZulu FC